PGL – Bieito Lobeira, porta-voz em matéria de Língua do BNG na Câmara galega, apresentou umha proposiçom nom de lei a Mesa do Parlamento, relativa à adopçom de medidas para garantir a exibiçom de filmes em galego no nosso País.
No documento recebido na caixa dos correios do PGL, explica-se que o cinema é um dos âmbitos nos quais fica mais latente a exclusom da nossa língua, já que os galegos e as galegas nom temos direito a assistir a salas de cinema comerciais e ver um filme na nossa língua, no nosso País. «Nom existe co-oficialidade no âmbito do cinema», denunciam do BNG.
Ademais, o documento assinado por Lobeira recolhe a negativa de várias salas a reproduzirem filmes rodados originariamente na nossa língua, caso de Pradolongo, por exemplo. Nesta mesma linha, do BNG denunciam a inexistência de legendas nos filmes em formato DVD.
Segundo explicam do BNG, os subsídios públicos discriminam a nossa língua, e assim, qualquer filme com orçamento inferior aos 1.500.000 euros, nom poderá solicitar ajudas públicas.
Por estas razons, do BNG instam o Parlamento galego a tomar um total de medidas, a saber: criar um instituto galego de dobragens com o intuito de que as estreias cinematográficas tenham versom em galego; garantia de exibiçom de filmes em galego (no mínimo, 10 por ano); programar círculos de exibiçom de filmes alternativos; garantir a oferta em galego, quer na dobragem, quer na legendagem de novas opçons oferecidas pola televisom TDT; assinar convénios com as principais distribuidoras para que incluam versom em galego nos filmes em suporte DVD; distribuir em galego as produçons nas quais participarem a CRTVG ou a administraçom galega; demandar do Governo espanhol (Ministério de Cultura) a modificaçom da Ordem Ministerial que desenvolve a Lei do Cinema, com o intuito de rebaixar a exigência do orçamento dos 1,5 milhons de euros para poder solicitar ajudas públicas; e definir e aprovar um quadro legal que ofereça garantia de exercício do direito linguístico.
+ Ligaçons relacionadas:
- Primeiros protestos contra cinemas que nom projectam em catalám [PGL, 05/02/2010]
- O galego, fora das salas do cinema comercial [PGL, 03/02/2010]
