PGL – A Ciberirmandade da Fala iniciou umha nova campanha no seu empenho por galeguizar as empresas do nosso país que apostam polo espanhol e obviam o galego. O objectivo desta vez, o banco Etcheverria.
Segundo o colectivo normalizador, o Banco Etcheverria foi fundado em Betanços em tempos do Reino de Galiza (1717), «do que ainda sai um velho mapa no seu web». É o decano dos bancos galegos e dos do estado espanhol e «gaba-se, ademais, de ser umha entidade que pretende um trato pessoal e directo com os seus clientes, mas lamentavelmente jamais falou a língua da sua terra. Depois de quase 3 séculos já será tempo de que isso mude», concluem.
Por todo isto, os promotores da iniciativa convidam a toda pessoa comprometida com a defesa da nossa língua a enviar um correio electrónico para umha das contas do banco (web [arroba] bancoetcheverria.es), apelando para a galeguizaçom do portal web da entidade bancária.
Ainda, da Ciberirmandade disponibilizam um modelo de mensagem:
Prezado senhor/a:
Farto de crises económicas e problemas financeiros mundiais, pugem-me a navegar por internet, procurando um banco ou caixa galego no qual guardar os meus aforros, ajudando assim os meus paisanos e a mim próprio.
Topei logo com o Banco Etcheverria, gabando-se de galego, de ter a sua sede social na Galiza, e tendo produtos como o “Índice Gallaecia”.
Mas qual foi a minha surpresa quando vim que o web nom falava a nossa língua nem como opçom.
E por isso que lhes queria sugerir, encorajadamente, que fagam umha versom em galego do web, e mesmo que esta versom seja a principal ao abrir a página. Nom vejo outra maneira de ser coerente com a sua própria filosofia, nem de respeitar os cidadáns dos que vivem e com os que convivem.
Pessoalmente hei permanecer aguardando a que, no mínimo, haja opçom a nos podermos comunicar.
+ Ligaçons relacionadas:
