Maria Espantoso – Mais umha vez, do PSOE estatal chegam decisons contrárias à igualdade efectiva do galego com o castelhano. O presidente do Congresso espanhol, o socialista José Bono, reafirma-se na sua postura de que só se pode utilizar o castelhano no hemiciclo.
Segundo Bono, permitir o uso do galego, o basco e o catalám obrigaria a realizar umha mudança do Regulamento do Congresso, mudança que já antecipou que nom está disposto a assumir, como tampouco chegou a fazê-lo o seu antecessor por nom ver o suficiente consenso.
No entanto, tampouco seria a primeira vez que o PSOE aprova medidas de grande importáncia sem contar com esse «consenso» e apoiando-se apenas nos votos dos seus sócios habituais no hemiciclo (BNG e ERC, e eventualmente IU ou Na-Bai), como precisamente fizo hoje em relaçom com a ajuda de 420 euros para pessoas sem emprego que esgotárom as prestaçons sociais, medida apoiada apenas por esses partidos.
No caso da proposta de utilizar outras línguas no Congresso o PSOE teria garantido aliás o apoio de outras duas forças com maior presença ainda como som CiU e o EAJ-PNV, polo que só estariam na contra os partidos mais espanholistas (PP e UPyD). Isso, com efeito, sempre que o próprio PSOE votasse em favor da medida, algo que se deveria pré-supor num partido que com freqüência fala da «Espanha plural» e do respeito polo multilingüismo. Porém, a decisom de José Bono de nem sequer considerar o debate pode fazer pensar com que onde nom existe esse consenso seja no seio do próprio PSOE.
