PGL – Segundo informa o Sindicato de Trabalhadores e Trabalhadoras do Ensino na Galiza (STEG) a Conselharia de Educaçom suspenderá as ajudas às aulas de Infantil em galego para ambientes castelhano-falantes.
O Programa, inserido no marco do Decreto 124/2007, de 28 de junho, polo que se regula o uso e promoçom do galego no sistema educativo, pretendia reforçar a dimensom comunicativa do galego em contornos castelhano-falantes e garantir a educaçom infantil em língua galega, no marco de um processo de normalizaçom linguística.
Com motivo do adiamento da Ordem pola qual se regula a concessom de subvençons a centros educativos públicos para a implantaçom de acçons que potenciem o ensino em língua galega na educaçom infantil, o STEG perguntou na Mesa Sectorial polo futuro desse programa de aulas de infantil em contextos castelhano-falantes.
A resposta da Conselharia foi «desconcertante» para o sindicato. Primeiro, porque «mostrárom um desconhecimento absoluto» dos programas que estava a desenvolver o departamento chefiado por Jesús Vázquez. Em segundo lugar, porque a sua resposta «foi negativa», envidenciando «um claro retrocesso» em matéria de normalizaçom do galego.
Ontem, o sindicato recebeu comunicaçom oficial do director geral de Educaçom, Formaçom Profissional e Inovaçom Educativa, Xosé Luís Mira Lema, garantindo a possibilidade de que os centros que o desejem continuem com o programa, mas advertindo de que nom contarám com o apoio das subvençons da Conselharia.
Perante esta situaçom, o sindicato afirma que continuará atento a «qualquer retrocesso em matéria linguística que pretenda levar a diante este governo linguicida».
