PGL – A Escola Popular Galega, a associaçom Agarimar, a Universidade Rural Galega e a Universidade invisível, definidos como «um novo modo de ensinar e aprender», som projectos que figuram na capa do n.º 84 do Novas da Galiza.
Este novo número da publicaçom soberanista traz umha completa reportagem sobre a educaçom popular através da realidade de quatro iniciativas diferentes mas que «simbolizam a capacidade do movimento popular galego de adequar-se a novas realidades, atendendo necessidades desconsideradas, polo menos a nível prático, há só umha década».
O Novas da Galiza n.º 84 inclui ainda várias entrevistas em profundidade. A primeira que podemos ler está realizada a a Ricardo Castro, secretário comarcal da CUT em Vigo. A seguir, e por ordem de apariçom, temos a oportunidade de ler as conversas com o galego David Vázquez Vilamor, membro da banda catalá Ràbia Positiva; e com Ugia Pedreira, directora de aCentral Folque, quem entre outras questons refere a falta de apoio institucional da nova Junta à cultura galega e de como se pode reconstituir um projecto ante a adversidade; e com a activista e poeta Luz Fandiño, um «exemplo de vitalidade e coragem militante» aos seus setenta e sete anos.
Além da reportagem já referida sobre as redes de ensino popular, há também mais quatro de enorme interesse neste número 84. Umha delas, sobre a situaçom das Encrovas trinta anos depois da desfeita ambiental e social; umha outra sobre o blogue Feijóo Mente —que analisa «os incumprimentos de programa, as incoerências e as mentiras» do actual Governo galego—; mais umha sobre o novo Decreto eólico do PP e as conseqüências que terá em diferentes ámbitos; e finalmente umha outra sobre o fenómeno Erasmus, as motivaçons e carências do projecto e o impacto lingüístico sobre pequenas cidades como Compostela.
A unidade do independentismo ante o 6 de Dezembro, a publicaçom do último informe sobre os direitos civis na Galiza ou a decisom de Siareir@s Galeg@s de organizar este ano o jogo de futebol da selecçom nacional som alguns dos muitos conteúdos que poderíamos salientar de um número que se completa com artigos de opiniom de Francisco Rodríguez, Ugio Caamanho, Duarte Ferrim, Nuno Gomes, Óscar de Lis, Francesco Traficante, Toni Lodeiro e Leo F. Campos, além do humor do mestre Pepe Carreiro.
A Revista
Já no suplemento A Revista continuam com mais um roteiro. Nesta ocasiom viajam à freguesia de Santa Maria de Deixevre, no Concelho de Oroso, lugar onde começa a «Rota do Grelo» segundo a banda de rock Kastomä, debido a que no trecho da estrada N-500 de Ordes a Deixevere é onde as mulheres da zona vendem grelos frescos às pessoas que vam em carro numha «surpreendente cena de choque entre a modernidade motorizada e a proverbial paciencia camponesa». Mas Deixevre é também a terra onde estava o «refúgio castrejo» do Exército Guerrilheiro da Galiza, no lugar de Bouça Longa.
Completam os conteúdos d’A Revista umha foto-reportagem sobre artistas e instrumentos e a habitual secçom de humor da plataforma ridiculista Sei o que nos Figestes…
 |
 |
Clique em cima das imagens para ver as capas em tamanho grande
+ Ligaçons relacionadas:
