PGL – Perante o iminente apagom analógico, o partido independentista NÓS-Unidade Popular (NÓS-UP) emitiu um comunicado no que reclamam televisom digital terrestre (TDT) no nosso idioma e a recepçom dos canais portugueses para todo o território lingüístico galego.
No comunicado fala-se da denúncia realizada por entidades berzianas perante a exclusom de territórios galegófonos na emissom da TVG a partir do apagom analógico, o que para Nós-UP vem confirmar a absoluta falta de previsom do governo anterior, que como noutros ámbitos favoreceu que o espanholista Partido Popular poda agora aplicar a sua política reaccionária e antigalega.
Para a formaçom soberanista, o movimento popular galego deve manter a reivindicaçom de uns meios de comunicaçom públicos, abertos à participaçom popular e integralmente em galego, frente à desarticulaçom da nossa comunidade lingüística imposta polas instituiçons públicas.
Para além do referido, Nós-UP apoia a reivindicaçom de que a emissom digital dos dous canais públicos em galego cheguem às cinco comarcas excluídas do actual Estatuto de Autonomia e insiste na premente necessidade que para o reforço da presença mediática da nossa língua tem a recepçom de todos os canais em português existentes na oferta da Televisom Digital Terrestre.
Iniciativa do BNG
Neste sentido, o Bloco Nacionalista Galego (BNG), que formou parte do anterior Governo da Galiza, apresentou recentemente umha iniciativa parlamentar para solicitar medidas que possibilitem a recempçom da TDT nesses lugares. Segundo o Bloco, actualmente está-se a elaborar um Real Decreto da Televisom Digital Terrestre que possibilitará que os canais públicos (como a TVG) emitam fora os limites da sua Comunidade Autónoma através do terceiro multiplex da TDT.
No entanto, lembra o BNG, esta fórmula exige a sinatura de um convénio entre as Comunidades Autónomas ‘afectadas’ por essas emissons digitais. Os nacionalistas também apontam que estas fórmulas já estám a ser estudadas noutros lugares do Estado espanhol, e nom só para a difusom de línguas minoradas, pois a televisom pública madrilena emitirá nas regions de Castela-a-Mancha e Castela e Leom.
+ Ligaçons Relacionadas:
- Comunicado na íntegra [web de NÓS-Unidade Popular]
