Nós Televisión anunciou ontem um novo programa de temática lingüística. Após umha longa etapa de quase quarenta colaborações em vídeo para a Rede Galega de Videoblogues, o presidente da AGAL Eduardo Maragoto e Nós Televisión decidírom ampliar os termos da colaboraçom, que se traduzirá num programa com periodicidade mensal de até 5 minutos de duraçom chamado “Galego de Todo o Mundo”, um formato produzido pola equipa de Nós Televisión que incorporará música, imagens e textos aos clássicos vídeos do filólogo ortegano. Os novos vídeos serám gravados em estúdio.
O programa continuará com a focagem didática, pretendendo aproximar temáticas linguísticas galegas nom só às pessoas interessadas na Galiza, senom também à comunidade lusófona em geral, onde alguns vídeos de Maragoto alcançárom bastante impacto.
No primeiro vídeo do novo programa, aborda-se a questom do uso do artigo nos topónimos galegos e na língua portuguesa em geral. Segundo Maragoto existe umha norma do galego escrito que atualmente se ensina nas escolas que nom só nos distancia da Lusofonia sem necessidade senom que também provoca muita confusom entre quem escreve em galego: trata-se do uso do artigo com topónimos quando estes nom se encontram em contexto frásico, nomeadamente nos letreiros das estradas.
