PGL – A ‘Praça dos livros’ de Carvalho acolhe mais um ano a feira literária mais original do país, na que os livros compartem posto nas bancas junto com os produtos alimentares típicos das feiras tradicionais da vila e desta época do ano.
Nos próximos quatro dias, até o 30 de agosto, Carvalho acolherá a celebraçom da feira ‘Praça dos livros’, na que livros, actividades lúdicas, apresentaçons, actuaçons, autoras e autores da comarca e do país, cinema, recitais, pam e muitas outras propostas encherám de vida, imaginaçom e criatividade o Jardim Municipal de Carvalho. Oferecemos a seguir o programa do evento:
Quinta-feira dia 27
Coincidindo com a feira tradicional de Carvalho que terá lugar durante toda a manhá, a feira literária abrirá com o pregom do excelso Quico Cadaval. Por volta das 19:30 horas o evento acolherá o recital e apresentaçom da antologia poética De Pondal ao Batallón Literario. 120 anos de poesía da Costa da Morte na que participarám os escritores Miro Vilar, Ernesto Fraga e ainda outros escritores da Costa da Morte.
Sexta-feira dia 28
Na jornada da sexta-feira, as actividades começam às 12:30 horas com a apresentaçom da obra Marcelo o Morcego, de Beatriz Fraga. Coincidindo com o fim da tarde, por volta das 20:00 horas, as ruas de Carvalho acolherám o espectáculo Á pista, malabarista! de Picompé, circo de rua.
Finalmente, a partir das 21:00 horas, a jornada ainda acolherá apresentaçom do poemário Olladas de um intre de amor de Alberto Suras, assim como um recital em homenagem do chairego Manuel Maria, no que participarám os escritores Felipe Seném, Henrique Rabunhal, Jacobo Lamas, Alberto Suras e Estibaliz Espinosa.
Sábado dia 29
A jornada do sábado abrirá com o ciclo de cinema ambulante A caixiña dos mistos, que terá lugar até as 21:00 horas e no que haverá umha selecçom de filmes para os mais pequenos. Por volta das 12:30 horas, a feira literária acolhe a apresentaçom da obra O misterio na selva de Ngorogón de Alberto Varela.
Às 19:00 horas o grupo teatral Teatro Patán, realizará o espectáculo literário Palabra de chapeu. Contos para xogar. Haverá ainda tempo para a apresentaçom da obra Contos azuis de Fernando Cabeça Quiles, às 20:30 horas.
Domingo dia 30
Desde primeira hora da manhá, a Praça dos livros acolherá o feirom do verao no que estarám disponibilizados para a venda os melhores produtos alimentares locais. Todas as pessoas que comprem um livro durante o feirom matinal, serám obsequiadas com um pam da marca ‘Pam de Carvalho’. Ainda, haverá tempo para a gravaçom de um capítulo para a série de internet Para marinheiros nós, dirigida por Omar Rabunhal.
Às 12:00 horas terá lugar a apresentaçom do livro A cociña de larpeiros, de Benigno Campos. No acto participarám ademais do autor, Xulio Amigos e Henrique Marinho.
Já durante a tarde, haverá o espectáculo Ciclobicicleta de Anxo Moure, encherá de contos as ruas de Carvalho. A feira chegará ao seu fim logo da apresentaçom da obra Sidecar, de Alberto Lema. Ademais do autor, na apresentaçom participará também Belén Lendoiro.
+ Ligaçons relacionadas:
