Os próximos dias 10 e 12 de novembro, decorreram via Zoom as jornadas desenvolvidas pola Deputaçom da Corunha, cujo principal objetivo, sinalam na convocatória, é “renovar o argumentário para as políticas públicas de normalizaçom linguística, em base a três eixos: manter espaços de reflexom, dar ideias práticas e fomentar o trabalho em rede”.
No primeiro dia, terça-feira 10 a proposta é: Boas prácticas para as linguas minorizadas do Estado (17h-18:30) com Paula Kasares, Isaac Lourido e Xian Naia. E posterior debate.
E na quinta-feira, dia 12, Revitalización lingüísticas en linguas ameazadas (17:15 – 18:30) com Mónica Barrieras e Itziar Idiázabal. E posterior debate.
A atividade é aberta e gratuita, mas as vagas para poder participar no encontro ao vivo através do Zoom som limitadas. Para inscriçons cumpre anotar-se neste formulário. Posteriormente a gravaçom será subida à conta da Deputaçom no Youtube.
SOBRE AS PESSOAS RELATORAS
Paula Kasares é doutora em sociolinguística, com estudos de grau e pós-grau em Filologia Vasca e Antropologia Social e Cultural. A sua tese de doutoramento tratou a continuidade geracional do êuscaro e a socializaçom linguística nas famílias vascofalantes. É a diretora do Serviço de Planificaçom e Promoçom do Êuscaro de Euskarabidea – Instituto Navarro do Êuscaro do Governo de Navarra.
Isaac Lourido é professor e investigador na UDC, licenciado em Filologia Hispânica e em Filologia Galega e doutor na área de Teoria da literatura e Literatura comparada. Foi leitor do Centro de Estudos Galegos da Universidade Nova de Lisboa. Participou em diferentes projetos culturais como Estaleiro Editora e atualmente fai parte do conselho de redaçom do jornal Novas da Galiza.
Xián Naia é graduado em Língua e Literatura Galegas, com um mestrado em professorado e outro em Literatura, Cultura e Diversidade. Trabalhou como bolseiro no Serviço de Normalizaçom Linguística do Concelho de Ames. Obtivo umha bolsa de investigaçom da Deputaçom da Corunha em 2019, na “Área de planificaçom sociolinguística“. Atualmente investiga de forma independente as possibilidades da regueifa para a normalizaçom linguística.
Mónica Barrieras é licenciada em Filologia Românica e doutora em Linguística, exerce como professora na Faculdade de Educaçom da Universidade de Barcelona e é membro do Grup d’Estudi de Llengües Amenaçades (GELA). Na sua linha principal de investigaçom trabalha sobre a diversidade linguística e o multilinguismo.
Itziar Idiazábal é Catedrática de Filologia Vasca e doutora pola Universidade de Xenebra na área da Psicolingüistica. No grupo de investigaçom ELEBILAB dirigiu numerosos projetos de investigaçom sobre adquisiçom da linguagem em crianças bilingues, análise discursiva do êuscaro e didática das línguas em programas bi-multilíngues que incluem língua minorizada. É fundadora e membro da Cátedra UNESCO de Património Linguístico Mundial da UPV/EHU.
