PGL – O secretário-geral da Política Lingüística da Junta da Galiza, Anxo Lorenzo, foi recebido com protestos e assobios na sua recente visita à Universidade de Compostela pola entidade estudantil da esquerda independentista, AGIR.
O responsável da Política Lingüística do actual governo do PP foi recebido com umha faixa na que se podia ler «assassino do galego», e com a distribuiçom entre o alunado de folhetos contrários à presença de Lorenzo na USC.
Reproduzimos a seguir a crónica redigida por AGIR:
A visita de Anxo Lorenzo à universidade de Compostela contou com a oposiçom dum grupo de estudantes independentistas. Antes da chegada do secretário geral de política lingüística, umha faixa escrita em letras vermelhas deixava testemunho do nosso rechaço às portas do salom de actos de Ciências da Educaçom.
O estudantado da esquerda independentista tem muito que dizer perante a falta de resposta organizada doutros colectivos ancorados no eleitoralismo barato e a política de salom. A presença dos principais inimigos do nosso idioma nos centros de ensino merece todas as manifestaçons de oposiçom que forem precisas para fazer-lhes ver que nom som bem-vindos. Que a comunidade escolar deste país nom está conforme com a sangria de falantes que está a levar por diante o Galego. E que a escola espanholista e acomplexada que temos é umha garantia da subsituiçom lingüística que está a impor o espanhol como hegemónico nas comarcas do nosso País.
Ao longo de dúas horas fôrom repartidos entre a centena de estudantes assistentes às jornadas “Educaçom e línguas na Galiza” um igual número de panfletos contrários à presença do secretário geral. Este foi entrevistado brevemente pola TVG no mesmo espaço em que a faixa de AGIR despreçava a sua presença. Antes da sua palestra, políticos da tríada parlamentar PP, PSOE e BNG divertiam-se nas dependências do salom de actos discutindo sobre quem era o maior defensor da “liberdade”.
Os espectáculos dos que vivem da miséria do nosso idioma, da normalidade democrática e do galeguismo bem-entendido, choca frontalmente com a realidade das pessoas que nas aulas da Galiza pretendemos viver plena e normalmente em galego. Por esse direito continuamos em pé.
