PGL – No próximo sábado, dia 21 de novembro às 19h00, a Casa das palmeiras de Neda acolhe umha nova jornada de polafias organizada pola Associaçom de Escritores em Língua Galega em parceria com a Conselharia de Cultura e a Câmara de Neda.
Entre outros actos, haverá tempo para as rimas populares, das quais falará Isidro Novo; as lendas de Neda e arredores, por Antonio Reigosa; ou a actuaçom do grupo de música tradicional Zoar o vento.
Como já informámos no PGL, as polafias som veladas de carácter festivo com conteúdos literários e musicais que a Associaçom de Escritores en Língua Galega (AELG) celebra e difundirá a través da web e que terám umha duraçom aproximada de 90 minutos. O projecto da AELG é coordenado polo vogal de Literatura de Tradiçom Oral, Antonio Reigosa, e conta com a colaboraçom de diversas associaçons e instituiçons.
A palavra polafía é um neologismo referido às reunions ou veladas de carácter festivo com conteúdos literários e musicais, e tem como objectivo primordial o de pôr em valor e resgatar do esquecimento o valioso património oral, literário e musical, galego. Assim, os organizadores explicam que o termo polafia quer reunir no seu significado o melhor dos diferentes matizes e acepçons de velhas palavras (polavilas, fias, fiadas, fiandons, seraos…) com semelhantes conteúdos.
A principal diferença, quanto ao desenvolvimento daquelas reunions de antigo com o desta nova proposta, é que agora, mercê ao avanço das novas tecnologias, temos a possibilidade de compilar esses encontros, favorecendo o arquivo e estudo do recompilado, assim como a difundir esse património.
Já quanto à realizaçom física do evento, a polafia requer da presença dum divulgador ou especialista que introduzirá e comentará as principais características das peças e géneros literários tratados, de um recitador de poesia anónima ou de autor de feitio popular; dum músico, que interpretará romances, coplas ou cantares de reizeiras tradicionais. Porém, o elemento humano transcendental e imprescindível no desenvolvimento de cada polafia constituem-no os homens e mulheres, narradores, cantadores, romanceadores etc, vizinhas e vizinhos de cada lugar onde se desenvolver a polafia, que actuaram como protagonistas, difusores dum rico saber.
+ Ligaçons relacionadas:
- Polafias, Literatura de Tradiçom Oral [PGL, 31/07/2009]
