PGL – Já está no ar o ciber-documentário Eu falo, no qual se recolhem várias histórias por todo o País já que “todo o mundo tem umha história com a língua”, segundo recolhe a página web do projecto.
Eufalo.TV é um projecto de documentário colaborativo, umha história colectiva sobre a língua do ponto de vista dos seus falantes. É, portanto, umha história feita a partir de pequenas histórias, um discurso feito com muitos discursos diferentes e variados, com o objectivo de que cada quem tire as suas próprias conclusons.
Ademais, Eufalo.TV é um web participativo baseada no vídeo, pensada para que as pessoas enviem a sua história pessoal com a língua. Para isso, recolherám-se peças breves gravadas com a câmara, o telemóvel ou a webcam do computador.
Os vídeos actualizarám-se a um ritmo de dous vídeos por semana, algo que pode aumentar na medida em que a gente, os falantes e os nom falantes, participem com o seu próprio material.Os conteúdos estám licenciados com copyleft, de maneira que os vídeos podem ser difundidos, reprodutivos e passados por quem quiger.
O portal no que estám disponibilizados os vídeos, desenvolvido integramente em software livre, foi desenvolvido pola equipa de A Navalla Suíza, que já em seu dia lançárom para a anterior Administraçom galega o portal de curta-metragens Flocos.tv , galardoado com o prémio Mestre Mateu à melhor obra interactiva. A navalla suíza é umha equipa de comunicaçom na internet formada por María Yáñez, Óscar Otero, Álvaro Gómez, Berto Yáñez e Xabier Cid. Ademais o projecto contou com umha outra equipa de colaboradores formada por Noa García, Manu Mayo, Belén Regueira, Araceli Gonda, Xandra Tedín, Mabel Montes, Mónica Ares e Matías Tarrío, entre outros.
