PGL – Arranca o I Simposium Internacional Ecolingua 2009 organizado polo Instituto Galego de Estudos Europeus e Autonómicos (IGEA), que terá lugar entre os dias 17, 18 e 19 de dezembro no Centro Social Caixanova de Vigo.
Nos três dias do simpósio, mais de 50 especialistas participarám em mais de 20 conferências e mesas redondas, nas que se analisará a realidade lingüística galega e se darám a conhecer modelos e políticas lingüísticas no âmbito do Estado e no plano internacional.
O Simpósio, organizado polo Instituto Galego de Estudos Europeus e Autonómicos (IGEA) que preside Anxo Quintana, conta com a colaboraçom da Câmara de Vigo, Caixanova e da Universidade de Vigo.
No simpósio haverá lugar para diferentes análises e assim, realizará-se umha diagnose sobre a situaçom lingüística galega em âmbitos como os mídia, a justiça e a administraçom, o ensino, as instituiçons, o mundo da empresa, as culturas emergentes ou a sociedade civil. Plataformas implicadas no actual debate lingüístico e instituiçons como a Real Academia Galega, a Secretaria Geral de Política Lingüística, o Conselho da Cultura Galega ou as universidades galegas tomarám parte no simpósio, no que, segundo a organizaçom, «é umha aposta, nom só polo rigor científico do evento assegurado com os e as especialistas convidadas, senom também pola pluralidade de opinions que contribuirám a enriquecer o debate e as conclusons do Ecolíngua 2009».
Mas também, por outra banda, a análise comparada doutras realidades plurilingües do Estado e do mundo ocuparám umha parte importante dos relatórios com os que se darám a conhecer os casos do Quebeque, Finlândia, Gales, Luxemburgo e das línguas eslavas. Especialistas da Catalunha, Euskal Herria, Valência ou Madrid falarám do contexto espanhol.
A lusofonia terá um apartado especial que será abordado polos especialistas Fernando Venâncio (Doutor e professor de língua e literatura portuguesana Universidade de Amesterdão) e Carlos Alberto Faraco (Doutor e professor de língua portuguesa na Universidade Federal de Paraná). Ainda, terá lugar o avance do documentário Brasil somos nós, de Carlos Núñez.
As conclusons do Simpósio serám apresentadas o sábado 19 de dezembro por Margarita Ledo. A clausura correrá a cargo de Anxo Quintana, presidente do IGEA.
