PGL – No último mês, foi lançada umha campanha de sensibilizaçom em diferentes vilas e cidades da Galiza, nas quais era possível ver o umha direcçom web para o endereço http://www.26945.org. Ontem, após vários dias de expectaçom, foi dado a conhecer o objectivo da campanha.
Oferecemos a seguir a mensagem publicada na referida página web:
Hoje o nosso País perde falantes. 26945 falantes de galego menos cada ano. Nos últimos meses vimos espalhando este número polas ruas do País. Desde hoje começamos umha campanha pedagógica para que todos os galegos e galegas saibam que a nossa língua está a ser substituída polo castelhano a um ritmo de 26945 falantes por ano.
O governinho do PP através da “Xunta de Galicia” e de entidades anti-normalizadoras e anti-galegas pretende aumentar o ritmo de desapariçom da nossa língua. O PSOE, nos últimos tempos camuflado de defensor do galego, é responsável no nosso País junto com o PP de defender um quadro jurídico-político que nega constantemente a única oficialidade da nossa língua e a plena normalizaçom em todos os ámbitos da vida pública.
Esta perda acelerada de falantes produz-se pola negaçom histórica dos direitos nacionais e linguísticos da Galiza. Hoje seguem a existir pessoas, com nome e apelidos, e instituiçons plenamente volcadas na negaçom dos direitos do povo galego e do direito de plena normalizaçom lingüística e polo tanto, como toda comunidade nacional normalizada: a prática do monolingüismo social.
Nos próximos meses, a mocidade galega mais combativa e consciente botaremo-nos aos centros de ensino, de trabalho e as ruas do Pais para denunciar directamente a todos e todas aqueles que tenhem responsabilidades directas na morte do galego e na extensom dos prejuízos contra o galego e os galego falantes.
Queremos fazer um chamamento à mocidade galega a denunciar no seu ámbito a todos e todas aqueles que tenham atitudes hostis e espanholistas cara a nossa língua. Fazer um chamamento para tomar consciência de que a nossa língua perde falantes e isto tem responsáveis concretos. Construamos um movimento juvenil forte e combativo que saiba castigar aos que hoje como onte som inimigos irreconciliáveis do galego, da mocidade galego e do País.
Em Galiza, 15 de Abril de 2010.
Menos falantes de galego, mais de espanhol
Nesta linha, o Diário Liberdade explicava ontem, que os dados do Inquérito de Condiçons de Vida das Famílias indicam que a percentagem de galegofalantes caiu 13 pontos em 5 anos.
Ainda, na nova assinada polo colectivo do DL, explicavam «Nom temos dúvida que este novo indicativo será, como sempre, desprezado polas instituiçons encarregadas da política lingüística na Galiza, como tem acontecido desde que os estudos de campo indicam a gravidade da situaçom. Porém, nom podemos deixar de informar sobre o acelerado processo de substituiçom lingüística em curso no nosso país, promovido directamente polas instituiçons públicas espanholas e o “apêndice regional” ao seu serviço, a Junta da Galiza».
Também pioram os dados sobre o conhecimento do galego
No plano passivo, o conhecimento da língua reduziu-se de 81,1% há cinco anos para 66% em 2008. No plano activo, se em 2003 67,9% afirmavam saber falar bem galego, agora só 54,1% di que fala bem a língua da Galiza.
Finalmente, do Diário Liberdade explicam que «nom é este o primeiro inquérito que nos lembra que estamos a perder a língua. Porém, nos últimos 30 anos de política lingüística teoricamente tendente ao “bilingüismo”, ainda nom vimos nem umha única demissom de um responsável dessa área em nengum governo. Nom duvidamos que continuaremos sem ver demissons nem muito menos puniçons para os responsáveis polo lingüicídio que sofremos. Com efeito, e faltando um estudo aprofundado dos dados do estudo em causa, a gravidade da situaçom tornaria obrigatória, no mínimo, umha demissom imediata de todos os responsáveis da política lingüística na Galiza, ou entom um reconhecimento de que, na realidade, os resultados som altamente positivos, porque é precisamente a desapariçom do galego o objectivo das políticas bilingüistas que durante todos estes anos nos conduzírom ao ponto actual».
+ Ligaçons relacionadas:
- 26945
- Inquérito oficial confirma perda acelerada de falantes habituais de galego [Diário Liberdade]
