PGL – O Cineclube de Compostela fecha a temporada 2008-2009 com a estreia absoluta do novo trabalho de Alberte Pagán, que estará presente no debate e na projecçom do filme.
Na quarta-feira dia 24 de junho, o Cineclube compostelano oferece em primícia a projecçom do último filme de Alberte Pagán, Tanyaradzwa, documentário experimental e independente de marcada influência warholiana. A obra, trata da vida, opinions e circunstáncias da mulher retratada, enquanto esta realiza umha narraçom oral.
A programaçom do documentário de Pagán é ademais um grande esforço para o Cineclube, já que se realiza com duas projecçons simultáneas em dous ecráns, ao jeito da projecçom originaria de Chelsea Girls, de Warhol. A projecçom dupla estimula a contraposiçom entre as duas partes de que consta o filme, umha que filma a vida rural dumha aldeia do Zimbábue através da mulher que dá nome ao documentário e outra que reflecte o mundo urbano de Harare e os conflitos que se estavam a produzir a começos do 2007.
O autor do filme, Alberte Pagán, é um cineasta galego habitual colaborador do Cineclube de Compostela, onde já tem apresentado outros filmes próprios como Bs. As., Pó de estrelas, Como foi o conto, Conversas em Zapatera ou Os Waslala, e ainda peças alheias da tradiçom experimental do cinema. Ademais, é autor do livro A mirada impasíbel. As películas de Andy Warhol.
Com o filme de Pagán, o Cineclube dá por fechada a programaçom regular da última temporada e a actividade cinéfila descansará até o Outono. Contouo, fica já programada umha festa de aniversário que terá lugar no dia 4 de Julho.
Com esta sessom especial e para deixarem tempo a um debate com o autor, o começo do evento fica marcado para as 20:30 horas. A entrada é de balde, mas quem quiger pode mercar um bilhete de ajuda para colaborar economicamente com o clube. O lugar de projecçom continua a ser o Centro Social A Gentalha do Pichel, sito na rua Santa Clara, 21 de Compostela.
