A entidade educativa popular e o governo municipal herculino organizam hoje, 23 de abril, um ato de homenagem com a instalaçom dumha placa comemorativa na primeira sede do centro educativo irmandinho.
A Escola de Ensino Galego foi umha iniciativa educativa popular e gratuíta das Irmandades da Fala caracacterizada polo seu espírito galeguizador, laico e pedagogicamente renovador que se desenvolveu entre os anos 1924 e 1930 na cidade da Corunha. O centro educativo, que contou com o magistério do editor Ângelo Casal e do docente Manuel Luís Acunha, abria as portas na Praça Maria Pita o dia 23 de abril de 1924, num momento histórico em que tanto o idioma galego, quanto o currículo vinculado com a realidade do País, estavam proibidos e perseguidos no sistema educativo estatal.
Homenagem polo centenário da escola irmandinha
O programa do evento, apoiado por mais de dez entidades sociais e culturais da cidade, será apresentado polo artista Xurxo Souto, dando começo às 11 h. da manhá com a chegada de escolares de todas as escolas Semente à Praça Maria Pita. Posterioremente realizará-se o decobrimento da placa na fachada do prédio nº17, que acolhia à escola irmandinha, por parte da Sra. Alcaidesa Inés Rei Garcia e do coordenador da Escola de Ensino Galego Semente, Santiago Quiroga Garcia. A seguir, intervirám os representantes citados, junto ao Catedrático em História da Educaçom, Antón Costa Rico, e ao aluno da Semente Compostela, Tiago Abal.
O programa contará com a atuaçom musical de Cántigas da Terra, ademais de jogos e passeios didáticos dramatizados, ministrados polos grupo Os Quinquilláns. O itinerário decorrerá da Praça Maria Pita até o nº 36 da Rua Real, segundo local da escola, onde também se localizava a casa de Maria Miramontes e Ângelo Casal; as editoras Lar e Nós e a administraçom de A Nosa Terra, assim como a matriz da Irmandade corunhesa.
Lançamento dumha Web temática e dum documentário
Com o objetivo de divulgar esta experiência educativa sobranceira, as Escolas de Ensino Galego Semente disponibilizam a web escolairmandinha.semente.gal, com recursos audiovisuais, unidades didáticas, folhetos divulgativos e artigos científicos para profundar no seu conhecimento. Da mesma maneira, poderá-se acompanhar o lançamento ao vivo do documentário “Aprender na língua própria, das Escolas de Ensino Galego à Semente”, o dia 23 de abril, às 20 h. Trata-se dum produto audiovisual, financiado pola Deputaçom da Corunha e pola base social da Semente, que estabelece um diálogo aberto entre épocas que confluem em problemáticas educativas semelhantes: discriminaçom linguística, centralismo educativo e menorizaçom cultural, mas também da resposta que historicamente foi elaborada por parte do povo galego através da iniciativa educativa popular, hoje representada pola Semente, para a construçom da sonhada Escola Nacional Galega.
