Por José Alberte Corral Iglesias
Os ideólogos neofascistas, os políticos ao serviço do capitalismo financeiro, sabem que é preciso vencer no eido cultural para que seja possível a doma e castraçom das classes trabalhadoras. Que o imaginário dos seus componentes deve estar construído nas chaves dadas polos seus “média”. Se isto nom se dá, a derrota do conjunto das classes populares nom está assegurada.
Só quando as naçons colonizadas perdem a sua expressom mais acabada que é a própria língua deixam de ser um colectivo em si para se converterem nuns dados contabilísticos mais do colonizador. Quando os povos indígenas de América perdêrom a sua língua, a sua cultura, desaparecêrom como naçom para se converterem em peons do colonizador. Só com o terror económico – precariedade laboral –, com a imposiçom política – sejam os regimes pseudodemocráticos eleitorais ou os regimes tirânicos –, nom é possível entoar a cantiga da vitória do capitalismo. Por isso estamos mergulhados numha guerra cultural permanente, por isso os grandes grupos mediáticos ponhem os USA como modelo e N.Y. como eixo cultural planetário com o inglês como A Língua.
Este é o modelo que sem renunciar ao grande círculo dos USA, a N.Y., mas inserindo-nos no círculo nazi-onanista do imperialismo madrileno sob os ditados FAES de Aznar, os pailans-pós-modernos de Feijoo e os seus “mariaches” tentam construir na Galiza connosco, com os galegos, essa é a razom axial da sua política de extermínio contra a Língua Galega.
Continuam com o discurso de endemoninhar o Galego levada polos seus antecessores franquistas; nom repetem as mesmas frases: “Habla cristiano”, “Habla bien”, etc. que cuspiam arreganhando os dentes aos nenos, aos obreiros, aos marinheiros, aos campesinos quando falávamos galego; porque nom estám ajeitadas aos novos tempos. Agora os violadores dizem que som eles os violentados, que precisam de protecçom e amparo para continuar maltratando as vitimas, que tenhem que ser ceivos de amarralhas para continuar com a política de aniquilamento do Galego.
Nom podemos esquecer que os novos fascistas estám actualmente em pé de guerra contra Nós, enquanto povo, como galegos, e enquanto classe, como trabalhadores. Que é umha guerra, das denominadas de IV geraçom, que procura reverter a nossa dignidade como povo, reverter as nossas convicçons como trabalhadores, e alterar os nossos sentimentos como cidadáns. Fagamos-lhe frente com a nossa dignidade de povo e classe, fagamos-lhe frente com a nossa integridade de cidadáns:
NOM VENCERÁM!
