PGL – Uma das figuras mais importantes da cançom de autor do Brasil, Fred Martins, e a cantante galega Uxía Senlle actuarám no mosteiro de Sam Paio, Castro Caldelas, com motivo do ciclo Duas noites de Música.
A Associaçom Amigos de Caldelas organiza por segundo ano o ciclo Duas noites, que no ano passado, em duas jornadas dedicadas ao conto, tivo a participaçom do excelso Quico Cadaval e o polifacético Carlos Branco.
Na segunda ediçom do festival, que terá lugar nos dias 12 e 13 de Agosto, a organizaçom oferece duas jornadas carregadas de cantos da lusofonia.
Os concertos terám lugar num marco inigualável, o mosteiro de Sam Paio, Castro Caldelas. O edifício, actualmente em estado ruinoso e à espera de ser reabilitado, está situado na cima dum outeiro, rodeado por vides e outra vegetaçom, no coraçom da Ribeira Sacra.
Na primeira das noites, dia 12 de Agosto, o músico brasileiro Fred Martins, oferecerá um concerto no que apresentará as obras do seu último trabalho Guanaraba, acompanhado polos músicos Sérgio Tannus, Isaac Palacín, e Álvaro Iglesias.
Já no dia a seguir, 13 de Agosto, a cantora galega Uxía, deleitará ao público assistente com o melhor da música lusófona tradicional com o espectáculo intitulado A travessia da saudade, numha viagem melodiosa por terras da Galiza, do Brasil, de Portugal ou Cabo Verde e na que estará acompanhada polos músicos Sérgio Tannus e Sérgio Salles.
+ Ligaçons relacionadas:
