PGL – O próximo domingo, dia 15 de janeiro, a Gentalha do Pichel em colaboraçom com a Agrupaçom Cultural O Facho e o Centro Social Gomes Gaioso organizam um roteiro polas ruas da Corunha visitando os mais emblemáticos lugares das Irmandades da Fala.
A cita, para quem acudirem desde Compostela, será às 9h45 na estaçom de comboios da capital da Pátria. O ponto de encontro na cidade da Corunha, e primeira parada do roteiro, será o Café Vecchio da Rua Real as 11h30, lugar em que se localiza um conhecido mural obra de Urbano Lugris.
A Corunha é o lugar onde em Maio de 1916 nasce a primeira das Irmandades de Amigos da Fala. E fijo-o com o objetivo inicial de organizar a defesa, a exaltaçom e o fomento da língua de Galiza, até se converter em semente fecundada do galeguismo moderno, que segue a dia de hoje oferecendo os seus frutos carregados também de novas sementes.
O caminho proposto pretende redescobrir aqueles lugares significativos para a atividade da própria Irmandade, assim como para os seus protagonistas. Entre a Rua Real e o Cemitério de Sam Amaro irám saindo ao encontro dos assistentes personalidades como Ángelo Casal ou Manuel e Urbano Lugris.
O remate da experiência dará-o um jantar para o convívio num mesom situado no mesmo lugar em que a família do próprio Ángelo Casal tivo umha fonda. Com a finalidade de facilitar o trabalho de organizaçom é preciso que os interessados em acudir ao jantar fagam a sua reserva pondo-se em contacto com a Gentalha no endereço eletrónico gentalha[arroba]agal-gz.org ou ligando para o 696 026 002.
