PGL – O director-geral de Mobilidade, Miguel Rodríguez Bugarín, emprega topónimos deturpados e intervém em espanhol no Parlamento, obviando desta maneira a recomendaçom do presidente do PP e da Junta da Galiza, Alberto N. Feijóo.
Embora a Lei de Transparência da Administraçom fixe que os cargos públicos da Junta «usarám normalmente o galego, oralmente e por escrito, nas relaçons com a cidadania», o director-geral de Mobilidade, Miguel Rodríguez Bugarín, emprega topónimos deturpados nas suas intervençons nos salons do Parlamento. Assim o denunciou o deputado nacionalista Bieito Lobeira, quem acusou a Rodríguez Bugarín de comparecer em espanhol e utilizar topónimos como «Orense».
No entanto, em contradiçom com a supra mencionada Lei, o regulamento da Cámara estabelece que os deputados podem usar qualquer umha das línguas oficiais. Fazendo referência a isto, o presidente da Comissom de Ordenaçom Territorial, também do PP, permitiu a Bugarín falar em espanhol e nom aceitou a queixa de Lobeira. Segundo destaca o diário A Nosa Terra, o presidente da Junta, Alberto N. Feijóo pediu aos seus conselheiros o uso do galego nas suas intervençons públicas.
