PGL – À caixa dos correios do Portal Galego da Língua chegou um comunicado da Associaçom Galega do Professorado de Educaçom Matemática (AGAPEMA), perante as Bases do Decreto do Plurilingüismo que promove o Governo do PP.
Polo seu interesse, reproduzimos a seguir o comunicado na íntegra:
A Associaçom Galega do Professorado de Educaçom Matemática (AGAPEMA), reunida em Assembleia Ordinária no dia 6 de Fevereiro de 2010, perante a exposiçom pública das Bases do Decreto do Plurilingüismo no Ensino nom Universitário da Galiza e considerando que afecta directamente ao tratamento das competências básicas na nossa matéria, decide pronunciar-se nos seguintes termos:
1. Nom existe critério pedagógico nengum para o desenvolvimento da competência matemática no que as maes e pais podam sustentar a escolha lingüística que se lhes sugere nas ditas bases. A manutençom da dita escolha poderia, porém, impedir o alunado compreender e desenvolver a Ciência em língua galega.
2. Ao abrigo do decreto do uso e promoçom do galego em vigor, a matéria de matemática exerceu de canal difusor do vocabulário técnico e das estruturas formais próprias do conhecimento matemático em língua galega. Umha terminologia que, doutra maneira, nunca teria chegado ao alunado nem, por extensom, à sociedade da que forma parte. Consideramos fundamental este labor divulgativo do professorado de matemática para a ubicaçom da língua galega nos ámbitos científicos e, portanto, para a sua promoçom, para o seu prestigio social e, em definitiva, para o seu uso em liberdade.
3. Durante estes últimos anos tanto o professorado de matemática como as industrias editoriais venhem de realizar um esforço criativo e de recompilaçom de recursos didácticos para o ensino da matemática em língua galega. Estes materiais, adaptados ao nosso currículo e as nossas circunstáncias socio-económicas, partem do próprio contexto e realidade do alunado, o que permite que a aprendizagem da matemática poda desenvolver-se com as máximas garantias de qualidade.
4. Na matéria de matemática o tratamento da competência lingüística tem características próprias como som a precisom na linguagem, a sua concisom, a sua falta de ambigüidade e o exercício exigente da compreensom leitora na resoluçom de problemas. Como professoras e professores de matemática acreditamos que, de maneira generalizada em núcleos urbanos, existe um grande desequilíbrio da competência lingüística em língua galega do alunado a respeito da competência lingüística em língua castelhana, em favor desta. Um desequilíbrio do qual as administraçons educativas devem ser conscientes para dispor as medidas que corresponderem baseando-se exclusivamente em critérios técnicos de carácter pedagógico e sociolingüístico, e dar assim cumprimento à legislaçomn vigente.
5. Da nossa experiência docente observamos que o uso veicular da língua galega na matéria de matemática foi recebido positivamente pola maior parte do alunado, tanto castelhano como galego-falante, e que, longe de implicar um impedimento na hora de adquirir os conhecimentos matemáticos, permite ao alunado melhorar as suas competências lingüísticas.
6. Com relaçom à veicularizaçom da nossa matéria numha língua estrangeira consideramos que, para que nom incida negativamente no desenvolvimento da competência matemática, deve realizar-se nos casos nos quais os centros disponham dos recursos necessários para o fazer, com professorado de matemática qualificado nessa língua estrangeira, com carácter voluntario e com umha alternativa em umha língua oficial para que a atençom à diversidade fique garantida.
