PGL – O Congresso Internacional Pontes de cultura, Pontes de futuro sobre os 15 anos de Ponte…nas ondas! apresenta-se como um evento de reflexom e debate sobre a iniciativa de comunicaçom que nascia nas beiras do Minho no ano 1995 com a denominaçom de Ponte…nas ondas!
Desde entom, as actividades impulsionadas pola Associaçom Cultural e Pedagógica Ponte…nas ondas! fôrom ampliando o seu rádio de difusom e também fôrom diversificando os seus âmbitos de actuaçom. Assim, com uns começos focados na actividade radiofónica interescolar abordárom-se sucessivamente projectos de âmbito cultural e internacionais ao abrigo de instituiçons como a UNESCO.
Neste sentido merece destacar o labor realizado como promotores da Candidatura Multinacional do Património Imaterial Galego-Português, que contou com os apoios da Junta da Galiza e dos governos de Portugal e Espanha.
Outros fôrom também os âmbitos onde se realizárom importantes actividades a partir da experiência de trabalho com os jovens, sendo especialmente significativas as iniciativas com as novas tecnologias, o trabalho de transmissom do património imaterial às novas geraçons e os intercâmbios internacionais.
Para avaliar este etapa de actuaçons desenvolvidas, fundamentalmente na Euro-regiom Galiza-Norte de Portugal, a Associaçom Ponte…nas ondas! organiza este Congresso do que se aguarda que surjam novas linhas de actividades e propostas achegadas por todos os participantes.
A educaçom, a inovaçom, o património cultural galego-português, a cultura e as tecnologias da informaçom e da comunicaçom som os âmbitos de trabalho deste congresso.
15 anos de Ponte… nas ondas!
