PGL – O Correlíngua terá na ediçom deste ano um incentivo especial, um certame que servirá como impulso para que agrupaçons ou solistas criem música na nossa língua, o Cantalíngua 2010. Como prémio, os três ganhadores tocarám em 11 concertos entre os dias 3 e 14 de Maio.
As músicas estám já a ser subidas nos webs Correlingua.org e Komunikando.net para que podam ser escuitadas, votadas e comentadas. Os grupos ou solistas ganhadores serám elegidos mediante um sistema misto, entre a votaçom popular na rede e o veredicto dum júri integrado por pessoas relacionadas com o mundo da música, que se conhecerá no dia 15 de Abril.
No concurso podem participar grupos ou solistas, amadores ou profissionais, de qualquer estilo musical que enviem umha cançom original em galego, com tema livre, em formato MP3, e sob licença Creative Commons, para o endereço electrónico correlingua[arroba]correlingua.org, antes do 10 de Abril, incluindo um co-e ou telefone de contacto.
Os ganhadores tocarám seguindo o percurso do Correlíngua. Assim, o primeiro classificado tocará 5 concertos, o segundo, 3, e o terceiro 2. Todos os concertos serám em horário de manhá e durarám meia hora. Ademais, o repertório musical deverá ser integramente em galego. A remuneraçom será de 700 euros por concerto.
Com esta iniciativa as entidades organizadoras (Asociación Socio-Pedagóxica Galega, a CIG Ensino, a Mesa pola Normalización Lingüística, as câmaras de Lugo, Ponte Vedra, Santiago de Compostela e Vigo, e a plataforma Komunikando), tencionam dar a conhecer a música galega entre os mais novos.
