PGL – O 16 de Março terá lugar a segunda sessom do Seminário sobre língua organizado polo Conselho da Cultura Galega (CCG), e que leva por título: Modelos de oficialidade / Língua e ensino.
A amplitude e intensidade que estám adquirindo os debates sobre a língua na Galiza, e muito particularmente a sua relevância política, levou o Conselho da Cultra Galega a considerar a necessidade de um foro de reflexom sobre a situaçom sócio-lingüística do País, a sua evoluçom recente e as fórmulas desejáveis para o futuro.
Para isto, terá-se em conta o quadro estatal espanhol e o ámbito luso-brasileiro, com o que a Galiza mantém umha estreita relaçom.
O seminário desenvolverá-se em quatro sessons, ao longo dos meses de Dezembro de 2009 a Junho de 2010, e cada unha delas estará focada para vários temas monográficos. Na primeira, que tivo lugar em Dezembro do passado ano, foi analisada a situaçom sócio-lingüística actual.
A segunda sessom, que terá lugar no presente mês de Março, centrará-se nos dous modelos possíveis de oficialidade e na regulaçom lingüística no sistema educativo.
Em Maio de 2010 haverá umha terceira sessom, na qual será analisada a situaçom sócio-lingüística nos mídia e no ámbito socioeconómico. O seminário encerrará com umha quarta sessom, em Junho de 2010, na qual se debaterá sobre os modelos de convivência para o futuro e se recolherám as principais conclusons das quatro sessons.
O objectivo final dos actos é a elaboraçom de um relatório, que conterá unha selecçom dos relatórios e intervençons no seminário, e um texto de conclusons elaborado polos coordenadores, que será submetido à discussom dos participantes. Este documento será também levado ao Conselho da Cultura Galega.
