PGL – Do portal web CiberIrmandade.org convidam os internautas a enviar um prego aos responsáveis da Agência Galega de Noticias para animar à companhia a apostar polo galego.
A Agência Galega de Noticias nasceu no ano 1985 promovida por vários jornais de âmbito local (La Región de Ourense, Diario de Pontevedra, El Correo Gallego com sede em Compostela, El Ideal Gallego da Corunha e Atlántico de Vigo).
Sem serem jornais que se tenham destacado polo uso do nosso idioma, mas entendendo que geram informaçom desde a Galiza e para a Galiza, da CiberIrmandade da Fala consideram que a informaçom nom é completa se a fonte de transmissom esquece à língua na que se desenvolvem a diário a maioria dos galegos e galegas.
É por esta razom pola que, a comunidade de usuários da web soberana, convida os internautas sensíveis perante a situaçom do nosso idioma na Galiza a enviar um correio electrónico aos responsáveis da Agência, que nom fornece nengúm tipo de informaçom em galego, embora isto seja contraditório até o ridículo, polos motivos já assinalados.
A seguir reproduzimos na íntegra o texto proposto pola CiberIrmandade da Fala para ser enviado as pessoas responsáveis. Eis a solicitude, para quem quiger contribuir com a defesa da nossa língua:
Quando entrei no web da Agencia Galega de Notícias figem-no com a certeza de que poderia informar-me no meu idioma, mas confesso que, ainda que som ciente da escassa presença do idioma galego na imprensa do nosso País, surprendeu-me que nom fora assim. Considero que a existência de umha agencia feita desde e para Galiza é umha boa noticia, mas, fica eclipsada pola exclusom da língua que fala a maior parte do povo de donde se leva adiante esta iniciativa. Porem penso que por profissionalidade, por respeito, por vissom prática, por objectividade e por inumeraveis outras razons deveria o seu web dar a possibilidade à gente de poder acessar no idioma galego.
Convido-lhes a que considerem esta proposta e a ponher da sua banda para que o idioma próprio da Galiza tenha presença para tod@s @s galeg@s, evitando discriminaçons e injustiças que pouco ajudam a dar umha boa imagem em geral tanto no País como fora dele.
+ Ligaçons relacionadas
