PGL – No próximo sábado, dia 10 de outubro, terá lugar umha jornada dedicada à célebre revista no Claustro do Convento de Cela Nova. No acto participarám testemunhos directos daquele projecto assim como diversos estudiosos da matéria.
Com apenas 4 números e um que ficou sem terminar, a revista, editada entre os anos 1959 e 1968 polo Padroado da Cultura Galega de México, influi toda umha geraçom inteira de moços e moças das décadas de 50 e 60.
Dirigida por Luís Soto e Carlos Velo, em Vieiros publicárom importantes vultos da intelectualidade da altura, e assim, entre os seus artigos podemos encontrar os nomes de intelectuais galeguistas como Outeiro Pedralho, Ramom Pinheiro, Celso Emílio Ferreiro ou Garcia-Sabell, ou os de Ferrín, Ramón Lorenzo e Arcádio López-Casanova, moços naqueles anos.
Coincidindo com o 50 aniversário da publicaçom do primeiro número, testemunhos directos daquela etapa e diferentes especialistas na matéria, reuniram-se na terra de Luis Souto para realizar um ciclo de conferências no que pessoalidades como Xosé González, Ferrín, Luís ‘Foz’, Herminio Barreiro, Ana Acuña, Margarita Ledo ou Roberto Noguerol (redactor-chefe do portal Vieiros, cujo nome homenageia a revista) deitarám luz sobre a influência da publicaçom nas geraçons posteriores e para celebrar a já célebre iniciativa galeguista que nasceu no exílio.
A jornada, intitulada Vieiros: A Vangarda Xornalística (1959-1968) começará após as palavras do presidente da cámara de Cela Nova, Antonio Mouriño, momento no que Xosé González Martínez, ‘Pepe de Redondela’, ministrará umha palestra sobre a influencia da revista nas geraçons de 1950 e 1960.
A seguir, Luís Gonçales Blasco ‘Foz’ falará sobre a censura à que Vieiros teve que se enfrentar num momento em que Manuel Fraga Iribarne era ministro de Informaçom no governo do ditador espanhol Francisco Franco. A seguir, Xosé Luís Méndez Ferrín falará a respeito do aspecto cultural da publicaçom.
Já na tarde, Herminio Barreiro Rodríguez falará de Vieiros: o impacto político, ideolóxico e estético nas conciencias do seu tempo, junto com a escritora Margarita Ledo Andión. As jornadas terám fim depois da palestra intitulada Na encrucillada dos vieiros: a revista Vieiros e @s galeg@s doutras periferias -Madrid, Arxentina, Cuba-, de Ana Acuña, e a visom presente e de futuro por parte de Roberto Noguerol.
+ Ligaçons relacionadas:
