PGL – A ferrolana Fundaçom Artábria acolhe hoje a apresentaçom do livro Galiza Vencerá!, de Maurício Castro, num acto que dá inicio ao programa de actividades preparado polo colectivo para celebrar o 11º aniversário do colectivo.
Às 20h30 do serao, na sede de Artábria, sita no Bairro de Esteiro, terá lugara apresentaçom do livro. A respeito da obra, numha entrevista concedida ao Portal Galego da Língua, o autor do livro manifestava:
«O livro limita-se a apresentar juntos umha série de artigos sobre temática sociolingüística, entendida esta como a problemática decorrente de um conflito lingüístico como o existente na Galiza. Qualquer pessoa interessada pola sorte do nosso idioma pode achar algum interesse em rever algumhas reflexons sobre episódios concretos da história da língua na última década no nosso país».
(…)
«Nesses artigos eu defendo que, nom sendo suficiente, é imprescindível que a Galiza exerça a sua soberania política plena para normalizar o idioma. Com isso nom chega, mas sem isso provavelmente tampouco o consigamos. O que pretendim nestes anos em que fôrom surgindo os artigos, foi convidar os galegos e galegas a reflectir sobre estas questons de fundo que som fundamentais para quem acreditar na Galiza como naçom».
Amanhá, manifestaçom
Para além da apresentaçom do livro do professor Maurício Castro, a Fundaçom Artábria convocou para amanhá, dia 25 de setembro, umha manifestaçom em defesa da língua em Ferrol. A marcha sairá da praça do Hino Galego e irá até a sede do Concelho de Ferrol, passando também pola sede do PP. A este respeito, no blogue da Fundaçom é possível escuitar a entrevista que Almudena Marcos, locutora de Radio Fusión, fizo a Rebeca Bravo e Maurício Castro sobre este acto reivindicativo.
+ Ligaçons relacionadas:
- Sítio web da Abrente Editora
- ‘Galiza vencerá!’, novidade da Abrente Editora [PGL, 27/07/2009]
- 25 de Setembro: manifestaçom em defesa da língua em Ferrol [PGL, 19/09/2009]
