PGL – Amanhá, quarta-feira dia 17 às 20h30, terá lugar a apresentaçom da obra Galiza vencerá! no Centro Social Henriqueta Outeiro de Compostela. O professor Maurício Castro, autor dos 28 artigos que conformam o livro, oferecerá umha palestra na que falará sobre língua galega.
Sob o título de Galiza vencerá! recolhe a novidade da Abrente Editora na altura de julho do presente ano. Umha selecçom de artigos, todos eles relacionados com a nossa língua e a sociolingüística, escritos por este professor de português na EOI de Ferrol e membro da Comissom Lingüística da AGAL.
O título já fora apresentado no Parque de Belvis coincidindo com o Dia da Pátria e a sua recente publicaçom. Naquela altura o PGL tivo a oportunidade de entrevistá-lo, e Maurício Castro fazia algumhas reflexons como as que se seguem:
«O livro limita-se a apresentar juntos umha série de artigos sobre temática sociolingüística, entendida esta como a problemática decorrente de um conflito lingüístico como o existente na Galiza. Qualquer pessoa interessada pola sorte do nosso idioma pode achar algum interesse em rever algumhas reflexons sobre episódios concretos da história da língua na última década no nosso país».
(…)
«Nesses artigos eu defendo que, nom sendo suficiente, é imprescindível que a Galiza exerça a sua soberania política plena para normalizar o idioma. Com isso nom chega, mas sem isso provavelmente tampouco o consigamos. O que pretendim nestes anos em que fôrom surgindo os artigos, foi convidar os galegos e galegas a reflectir sobre estas questons de fundo que som fundamentais para quem acreditar na Galiza como naçom».
+ Ligaçons relacionadas:
- Sítio web da Abrente Editora
- Entrevista a Maurício Castro [PGL, 03/08/2009]
- ‘Galiza vencerá!’, novidade da Abrente Editora [PGL, 27/07/2009]
