PGL – Acaba de ser pendurado no Youtube o vídeo no que o conselheiro Roberto Varela deturpa no grau máximo o concelho de Sobrado dos Monges, durante a apresentaçom de umha campanha turística em Fitur (Feira Internacional de Turismo), em Madrid.
Varela, que tinha negado ter feito tal cousa, fijo ouvidos surdos perante as petiçons de demissom que se venhem reiterando desde o dia que manifestou sem pudor que a cultura galega limita. Desta vez, Varela foi acusado de deturpar toponímia oficial, e na sua única forma legítima, em concelhos como Touro (*Toro) ou Sobrado dos Monges (*Desván de los Monjes).
Mentiras no Parlamento
Foram os deputados da oposiçom que recriminaram a Varela essa atitude. Perante as acusaçons, o conselheiro da Cultura afirmou no Parlamento da Galiza que «há que ser estúpido para acreditar que eu dixem ‘Desván de los Monjes’». À vista dos factos, fica demonstrado um facto gravíssimo, que é o de ter mentido perante a máxima instituiçom do País.
O conselheiro, que ocupou o cargo com a reivindicaçom de dinheiro público galego para a produçom cultural em espanhol, por considerar essa língua marginalizada no nosso País (sic), é deixado novamente em evidência. A prova chega hoje em forma de um vídeo que procede originalmente da web www.galiciavensientela.com, criada precisamente polo departamento que chefia Roberto Varela para umha campanha de promoçom turística da Galiza.
