Algumhas pessoas tardam em ser reconhecidas em toda a sua dimensom. A Camilo Nogueira Román nom falta o carinho e o reconhecimento de todos os galegos e galegas polo seu enorme contributo político à autonomia galega, mas ainda se repara pouco na atitude que tomou em Estrasburgo entre 1999 e 2004, ao usar, nas suas intervençons orais e escritas, o galego-português. É umha das razons pola qual foi nomeado membro de honra da Associaçom Galega da Língua (AGAL) em 2005.
Como tantas e tantos intelectuais atuais ou já falecidos, Camilo defendeu “a convergência plena do galego no galego-português intercontinental” em numerosos artigos e entrevistas. Porém, foi mais longe do que isso, e quando tivo oportunidade de o fazer onde realmente era necessário, nom deixou de pôr em prática a unidade que tantas vezes tinha defendido na teoria. Ele já tinha demonstrado grande afouteza noutras áreas, avançando com propostas nem sempre compreendidas na grande casa galeguista… mas o gesto de colocar a nossa variedade no mapa das línguas europeias é, para além de valente, simplesmente impagável.
Eduardo Maragoto. Presidente da Associaçom Galega da Língua (AGAL) Texto no volume coletivo
O ato de homenagem a Camilo Nogueira realizado esta sexta-feira no Auditório da Galiza congregou centenas de pessoas de grande diversidade ideológica, e nom apenas da grande casa comum do galeguismo. À entrada e saída do evento, toda a gente lembrava ainda o grande reconhecimento de que goza Camilo Nogueira no conjunto da sociedade galega.
Honestidade, valentia e teimosia. Três qualificativos explicam o sucesso “interideológico” do ato que convocou centenas de pessoas em Compostela com vontade de aplaudir com força Camilo Nogueira e o seu legado, passado, presente e futuro. Assim foi destacado por muitos e muitas das comunicadoras de um ato que foi apresentado pola jornalista Fernanda Tabarés e os escritores Manuel Rivas e Suso de Toro. O segundo explicou como foi difícil que Camilo aceitasse a homenagem e admitiu que o político se encontrava ali “à força”. Já o primeiro, definiu Camilo como o “construtor de escadas”, em oposiçom ao tópico do galego que nom sabe se sobe ou baixa.
Houvo representaçom de todos os partidos parlamentares. Pedro Puy, do PP, usou umha metáfora em certo modo paralela à de Manuel Rivas, destacando que, para além das ideologias que as pessoas professam, é preciso gerar instrumentos institucionais para estas se confrontarem, como fijo Camilo Nogueira com o seu enorme contributo à Autonomia galega durante a transiçom. Pedro Puy entrou no ato acompanhado de Xoaquín Leiceaga, Ana Pontón e Luís Villares. O primeiro salientou o europeísmo militante do Camilo quando nom era a posiçom mais popular nas fileiras nacionalistas. Pontón, por sua vez, lembrou que o Camilo sempre apostou em forças políticas próprias para a Galiza, e Villares refletiu sobre o a pegada política de Camilo na sua geraçom. Discursos emocionados dados por ordem alfabética, como explicou Tabarés entre umha das gargalhadas do público nessa noite.
Entre a música galego-portuguesa de Tundal, Pardal na Rúa e Uxía, fôrom entrando mais amigos e amigas do político viguês. A lembrança do passado sindical e político do Camilo correspondeu a Pencha Santasmarinas, Ana Gandón ou Ana Miranda. As três celebrárom a sua entrega, capacidade de liderança e o ambiente de trabalho e debate sem limite de que gozavam as organizaçons em que marcou presença. A última, Ana Miranda, foi a encarregada de render tributo à sua açom política em Estrasburgo e recebeu um dos aplausos mais sonoros da noite quando lembrou as suas intervençons em galego-português. A partir dela, poucos intervenientes deixárom de lembrar esta faceta. Umha delas, Uxía Senlle, que foi corresponsabilizada polo próprio Camilo por trabalhar em prol do galego como língua internacional. Outro, o eurodeputado Gorka Knorr, que referiu como, desde a sua passagem pola Eurocámara, esta ficou com sotaque galego, lembrando como o Camilo detestava que a nossa língua, sendo internacional, fosse denominada “minoritária”.
Chegou o momento dos presentes, entre eles o dos netos e netas. A primogénita, cujas palavras protagonizárom um dos momentos mais emotivos da noite, foi a encarregada de lhe entregar um volume coletivo que conta com mais de umha centena de textos de homenagem, vários deles de sócios da AGAL ou em reintegrado.
