PGL – O blogue Pois xa que o sabes, do diário Xornal.com, publicava recentemente umha resenha sobre Caja Duero, entidade financeira espanhola, operativa na Galiza, que qualifica a nossa língua como ‘problema’.
Oferecemos a seguir, os quatro pontos expostos no blogue:
Em pleno debate sobre o futuro do galego, umha entidade financeira assentada na Galiza vem de situar a língua própria na categoria dos “problemas”. A entidade salmantina Caja Duero, recentemente fusionada com a leonesa Caja España, decidiu rejeitar um certificado achegado por um cliente e procedente da Junta.
O usuário da entidade castelhana, da cidade de Lugo, pretendia dar de baixa a sua dona, recentemente falecida, como titular dumha conta bancária. Com esse objectivo, deu conta à entidade da liquidaçom do imposto de sucessons, um tributo administrado pola Junta e cuja certificaçom é emitida em galego.
“Os documentos entregados estám emitidos em idioma galego, que desconhecemos”, sentenciou Caja Duero. “Portanto –explicou a caixa– estes devem ser remetidos em castelhano ou no caso de se encontrarem em galego, traduzidos para o mesmo por traduçom jurada”. Só assim o cliente lucense poderá realizar o trâmite.
O afectado, que considera “brincadeira” o acontecido, por se tratar “dumha imposiçom dumha entidade que tem sucursal em Lugo”, já pujo o caso em maos dum advogado. Por enquanto, a caixa indica que um documento redigido em galego é “um problema” . “Nom nos imos poder comunicar”, concluem.
