PGL – O Ateneu Ferrolám, fundado em 1879, acolhe até o dia 15 de setembro a exposiçom biográfica sobre o mestre galeguista, escritor e político de Silheda Alonso Rios, o «Sinhor Afrânio».
No processo de documentaçom colaborárom muitas pessoas relacionadas de algum jeito com a figura de Alonso Rios, assim como 15 colectivos culturais, entre eles, a Comissom pola Memória Sinhor Afrânio e Adellís Associaçom Sócio-Cultural de Silheda.
A exposiçom é parte do projecto «Roteiro do Afrânio», criado para divulgar a vida e obra do primeiro deputado agrarista da Galiza. Para além do referido, o projecto conta cumha página web, um guia de turismo cultural e um roteiro entre Tui e a Serra da Peneda em Portugal. Ainda, entre os diversos actos realizados, inclui-se a projecçom do documentário Afrânio, de Víctor Coyote.
Comissariada polo historiador e biógrafo Bieito Alonso, a mostra consta de 37 painéis divididos em 3 fases vitais de Alonso Rios:
– 1887-1936: O nascimento na Cortegada, Silheda. Mocidade, emigraçom e regresso com a instauraçom da IIª República. Actuaçom como activista agrário e político galeguista.
– 1936-1939. O Sinhor Afrânio. As peripécias de fugido e esmoleiro ‘Sinhor Afrânio’ polos Montes das de Ponte Vedra e Ourense até passar a Portugal e ao exílio na Argentina.
– 1939-1980. Exílio definitivo na Argentina, onde chegará a ser secretário-geral do Conselho de Galiza, legitimo governo galego, e o último dos patriarcas do nacionalismo histórico em desaparecer.
Mapa do Roteiro do Afrânio:
+ Ligaçons relacionadas:
