MPG – A Escola Livre da MPG de aCentral Folque do Centro Galego de Música Popular inicia o curso 2009/2010 com um novo projecto académico depois de que o Agadic rejeitasse o convénio que permitia a presença desta entidade na Escola de Altos Estudos Musicais e o orçamento para levar a cabo esta docência.
Com esta falta de apoio o projecto curricular, único na Península para este género musical e que oferecia umha formaçom integral para o alunado, fica pois, estacionado dentro da organizaçom estrutural de aCentral.
Seja como for, aCentral Folque continua a aposta pola educaçom personalizada com aulas individuais com músicos profissionais em activo de reconhecido prestigio na cena da música tradicional e folque:
Gaita (ministrado por Edelmiro Fernández), Canto (programa compartido por Guadi Galego, Paulina Ceremusynska, Ramón Bermejo e Xavier Díaz), Percussom tradicional (Francisco Estévez “Chuco”), Sanfona ( Óscar Fernández), Violino (Gutier Álvarez), Acordeom diatónico ( Pedro Pascual) e Flautas e requinta (Roberto Sala). Ademais incorporam-se duas novas especialidades: Regueifa (ministrado por Luís Correa “O Caruncho”) e Introduçom à teoria da Música e o arranjo folque (ministrado por Benxamín Otero e Pedro Pascual).
Mercê ao apoio da Concelharia de Cultura de Santiago e às matrículas do alunado, as aulas ministarám-se entre os Centros Socioculturais das Fontinhas, A Trisca, Conjo e o Castinheirinho nas segundas, sextas e sábado, dependendo das especialidades.
Para além da oferta de cursos regulares, aCentral Folque oferece umha série de cursos monográficos durante todo o ano sobre algumha especialidade em prática instrumental: corda (guitarra, mandolina…) com Pancho Álvarez, músico de Carlos Núñez; iniciaçom à harmónica com Xico de Carinho, didáctica do baile galego com Xavier Iglesias; pedagogia Kodály com Sergio de la Ossa; pandeiro quadrado com Luís Prego, acordeom diatónico de iniciaçom e avançado com Carlos Quintá e Artur Fernandes.
Para este curso programa-se também um projecto de aulas magistrais com mestres internacionais: master class de Fred Martins sobre a música do Brasil ou a de Alejandro Vargas sobre o piano em Cuba que terám lugar nos vindouros meses na Faculdade de Jornalismo e no Conservatório Profissional de Música, respectivamente.
Texto fundacional da escola livre da MPG
A MPG (Música Popular Galega) é a banda sonora da Galiza. O poder da MPG é desconcertante e subestimável pois agudiza a participaçom social e leva-nos à coesom, fala-nos da nossa própria existência. A MPG deveria formar parte da educaçom de toda pessoa livre. Por isso, aCentral Folque pom em andamento a Escola Livre MPG, herdeira do Conservatório de Música Tradicional e Folque de Lalim e a Escola Folque de Santiago.
Somos alquimistas que estudamos e reinventamos as formas populares potenciando as qualidades do alunado com o qual caminhamos juntos na mesma direcçom.
A Escola Livre da MPG é um ninho de pássaro onde criamos situaçons, lugares de troca de experiencias; é um projecto generoso que divulga e cria informaçom pondo em contacto estudantes com músicos e músicas em espaços vivos, mutantes e ambulantes. A comunidade da Escola Livre participa de umha formaçom complementaria fora da aula, extensível ao palco, ao estúdio de gravaçom, à rua…
– A Escola Livre da MPG expande-se pola cidade de Compostela, fazendo-se mais visível e espalhando ideias musicais.
– A Escola Livre da MPG é umha cunca onde se bebe da sabedoria colectiva.
– A Escola Livre da MPG é umha rede que fia vontades.
– A Escola Livre da MPG continua a abrir janelas para a música galega.
+ Ligaçons relacionadas:
- Info [arroba] folque.com
- Centro Galego de Música Popular
