PGL – A concelheira de Normalizaçom Lingüística, Guadalupe Rodríguez, apresentou umha nova campanha de promoçom do uso da língua galega, que mais um ano aproveita a data de Sam Valentim (14 de Fevereiro) para fomentar relaçons afectivas face ao idioma.
“Namora-te da língua” é o título desta iniciativa, dirigida a rapazes e raparigas de 3º e 4º da ESO. Haverá prémios para as mensagens mais originais e criativas.
Segundo explicou Guadalupe Rodríguez, “Namora-te da língua” está dirigido a escolares duns 14 ou 15 anos, por serem estas idades muito vinculadas ao descobrimento das relaçons afectivas. A campanha já está sendo difundida nos centros de ensino do Concelho, onde os rapazes encontram a imagem com o lema da campanha: “Tes unha cita a cegas. Ven e namorate da lingua” (Tens um encontro às escuras. Vem e namora-te da língua).
O objectivo é fomentar a criatividade e as relaçons sociais da mocidade para incentivar um jogo de interesse, descoberta e diversom com a língua.
Por cima das suas mesas os alunos e alunas encontrarám umha máscara com as instruçons para que podam participar na iniciativa. Terám que escrever na máscara umha mensagem que fomente as relaçons afectivas face a língua galega, fazer fotografias com a máscara posta e subi-las ao web www.namoratedalingua.com.
A máscara deve cobrir completamente a cara e impedir a identificaçom das pessoas que nela aparecerem. Poderám subir-se as fotos e lemas até o dia 19 de Fevereiro.
Também no web, qualquer um pode votar as fotografias e slogans. Para os lemas mais originais e criativos haverá prémios como umha cámara de fotos, um bono-ajuda para comprar livros, um MP4 ou entradas para concertos.
