PGL – O Governo do Aragom anunciará na vindoura convocatória de oferta de emprego público para professores da Primária -prevista para 2011- vagas de professor de catalám e aragonês. Actualmente, este professorado nom precisava superar qualquer exame, apenas acreditar uns requisitos.
A partir do curso 2011/2012 terám que superar a oposiçom para conseguir o emprego. É umha das novidades da aplicaçom da lei de línguas, aprovada o passado dia 17 de dezembro e que está ainda pendente de publicaçom.
Actualmente há 42 professores de língua catalá e quatro de aragonês, e este será, provavelmente, o número de vagas que oferte o Governo de Aragom em 2011. Ademais, tanto o aragonês como o catalám passarám a integrar-se no horário oficial escolar, quer dizer, formarám parte do currículo aragonês nas zonas de utilizaçom de cada língua. Neste sentido, o Executivo autonómico fomentará a ediçom de materiais didácticos para incorporar no esnsino destas línguas. No ámbito universitário, a lei prevê a criaçom das especialidades de Filologia catalá e aragonesa.
Ademais, as administraçons públicas deverám pôr a disposiçom da populaçom formulários nas três línguas e modificar as rotulaçons dos municípios para adapta-los à língua própria, quando for necessário.
