PGL – As Festas dos Ajóujeres –que já vam pola terceira ediçom– constituem um programa de dinamizaçom lingüística que busca favorecer a transmissom do galego desde a infância, ao tempo que oferecem umha experiencia sonora, visual, táctil e psicomotora.
Depois de apresentar o programa deste ano na Corunha e Ferrol, o espectáculo infantil viajará no dia 12 até Ourense (parque Barbanha); no domingo 13 até Lugo (horta do Seminário), e no dia 19 até Ponte Vedra (praça da Ferraria). As duas últimas paradas serám as de Vigo (praça do Rei), no dia 20, e Compostela (igreja de Santa Susana, na Alameda), no dia 26.
Na ediçom deste ano, as Festas dos Ajóujeres achegam-nos a viagem que realiza Totó, um bonequinho azul, acompanhado por Eli. Juntos percorrerám a terra, o mar, o aire e incluso o Sol para encontrat a Pope, o grande amigo de Totó do que vai dando noticia o Sr. Carteiro. Ademais, para poder seguir gozando na casa das aventuras de Totó, Política Lingüística habilitou um espaço web no qual as crianças podem escuitar as músicas, descarregar as letras e mesmo desenhos.
Em todos os casos realizará-se umha funçom às 12 horas, baixo carpa e limitada a 300 pessoas. Em Vigo e na capital galega haverá, ainda, umha segunda funçom às 17h30. A entrada é de graça em todos os casos.
Umha vez rematados os espectáculos deste mes, as Festas dos Ajóujeres derivarám num formato mais reduzido e percorrerám concelhos mais pequenos, chamado Encontros dos Ajóujeres. A diferença respeito das festas é que os encontros decorrem em espaços fechados –como centros socioculturais– e para um público menos amplo, estimado por volta das 70 pessoas.
Durante os meses de outubro e novembro, os Encontros dos Ajóujeres percorrerám as localidades de Ginzo, Cela Nova, Lalim, Valga, Ogrobe, Moanha, Arçua, Ames, Laracha, Castro do Rei, Barreiros e Carinho.
A Secretaria-geral de Política Lingüística outorga-lhe umha grande prioridade aos segmentos de idade mais novos na planificaçom da sua actividade de dinamizaçom social da língua. Ademais, a partir de setembro começam também novas actividades do programa Bocaberta, dirigidos às idades de 3 a 18 anos, que também viajarám por toda a geografia galega.
+ Ligaçons relacionadas:
