PGL – Numha nova mostra do desprezo sintomático do governo do Partido Popular ao idioma próprio da Galiza, as provas de acesso ao corpo docente dependente da Junta da Galiza perdem neste ano as provas específicas de língua galega.
Com esta decisom, o Partido Popular abole o requerimento de demonstrar algum conhecimento da nossa língua por parte dos e das aspirantes a docentes, vulnerando assim os direitos lingüísticos de milhares de alunas e alunos, por nom garantir a competência do professorado na que o próprio Estatuto considera “língua própria” da Galiza.
Ademais, nas provas de acesso deste ano já nom será necessário apresentar a programaçom em galego, único aspecto em que existia obrigatoriedade de demonstrar umha mínima competência, representando um terço da prova de acesso.
Do sindicato galego CIG-Ensino lembrárom que o decreto ainda em vigor prevê uns conteúdos docentes em galego que nom podem garantir-se sem um nível lingüístico adequado por parte do professorado, com o qual o PP volta a incumprir a lei em funçom dos seus interesses políticos, dependentes da estratégia espanholizadora que vem protagonizando desde o passado 1 de Março.
Na mesma linha, a STEG anunciou que defenderá a manutençom da prova de galego nas provas deste ano e o alargamento da competência necessária para aceder ao corpo docente galego.
