PGL – Bieito Lobeira, representante do grupo parlamentar e portavoz em matéria lingüística do Bloco Nacionalista Galego, apresentou umha pergunta para a sua resposta escrita ao Governo galego sobre as medidas que vai adoptar perante a publicaçom do livro Hablar bien no cuesta nada, publicado recentemente pola Editora espanhola Temas de hoy.
A editora publicou em Madrid o livro Hablar bien no cuesta tanto. Dudas, etimologías y curiosidades de la lengua española, da autoria de Pancracio Celdrán. O autor recolhe na obra ultrajes e impropérios cara o nosso povo, recolhidos na acepçom galego. Assim, para o autor, o nosso gentílico é sinonimo de: cobarde, embustero, avaricioso, falso, hipócrita, descarado, gorrón, cabezota, terco, tacaño, fanfarrón.
No documento, Lobeira destaca que galego é o único gentílico que aparece no livro e aponta que «o tópico absurdo (e intencionado) converte-se assim em insulto. Nom aparecem outros, como os relativos à soberba dos madrilenos ou à preguiça dos andaluzes. Nem tampouco se atrevem com os vinculados a cataláns e bascos, que também existem. Com todos eles há sumo cuidado. Connosco, com o povo galego, insulto e aldraje».
Ainda, o deputado nacionalista explica que esta nom é a primeira vez que feitos como este se produzem e lembrou o livro xenófobo Chistes de gallegos, editado por Planeta, ou os insultos que se vertem no Dicionário da Real Academia de la Lengua española. Esta atitude, di Lobeira, «cria um caldo de cultivo que propicia o desprezo, a humilhaçom e a caricatura da Galiza e do povo galego».
Por todo isto, e para evitar a propagaçom de tópicos sobre os galegos fora da Galiza e defender a auto-estima colectiva dentro do próprio país, Bieto Lobeira pergunta à Mesa do parlamento:
1 – Que avalizaçom realiza o Governo dos feitos denunciados?
2 – Que medidas se adoptaram por este motivo?
3 – Que actuaçons serám postas em andamento para evitar a reproduçom no futuro de feitos de similar natureza contra da Galiza e do povo galego?
+ Ligaçons relacionadas:
- Campanha contra a definiçom do termo ‘gallego’ no dicionário da RAE [PGL, 10/09/20009]
- A RAE tirará do seu dicionário «tonto» como sinónimo de «gallego» [PGL, 10/07/2009]
