PGL – O porta-voz em matéria lingüística do BNG, Bieito Lobeira, apresentou à Junta umha pergunta para a sua resposta escrita relativa às represálias sofridas polo alunado de um centro de Ponte Vedra por aderir à greve do ensino em defesa da língua galega, no passado dia 21 de Janeiro.
A greve convocada por Queremos Galego para defender o galego no ensino secundário tivo conseqüências para umha parte do alunado do IES Sánchez Cantón que se somou à greve.
No documento recebido na redacçom do Portal Galego da Língua, Lobeira destaca que numha aula de língua espanhola do primeiro curso de bacharelato, em que 25 em 30 alunos alunos aderírom à greve, tivérom represálias de extrema gravidade. Assim, os cinco alunos que assistírom às aulas somárom automaticamente mais 0’25 pontos para a nota global do trimestre, ficando ademais excluídos do estudo do tema ministrado nesse dia (El cantar del Mio Cid). Ainda, no dia seguinte, um dos alunos que aderira à greve, foi chamado ao quadro e restárom-se-lhe 0’25 pontos.
O BNG explica que é terrorífico que no ano 2010 ainda existam as represálias académicas por defender a língua do País, para o alunado que com plenos direitos constitucionais decide secundar a greve.
Nesta linha, Bieito Loberia acusa a Conselharia de Educaçom de criar o clima propício para a apariçom de reacçons violentas, pola atitude da própria Conselharia perante a greve e por que o web oficial do mesmo aparece a equaçom: Liberdade perante a imposiçom. Dialogo perante a greve. Ainda, Lobeira denuncia que quem apoia a greve, é visto a olhos da Conselharia como alguém fechado, separado, a defensiva e com medo da modernidade.
Atendendo a isto, Lobeira pergunta à Mesa do Parlamento:
1 . Conhece a Conselharia de Educaçom os feitos denunciados?
2 . Que avaliaçom realiza dos mesmos?
3 . Tem previsto iniciar umha investigaçom no IES Sánchez Cantón de Ponte Vedra, contando também com a visom do estudantado, com o intuito de esclarecer o acontecido e depurar as responsabilidades que se derivem destes graves feitos?
4 . Que medidas concretas serám adoptadas por este motivo?
