PGL – Já finalizou o Dia das Letras, mas no Centro Social Mádial Leva! continuam os eventos do Mês da Língua. Para a quinta-feira 28, convidárom a José Manuel Barbosa, historiador e membro do conselho da AGAL, que ministrará umha palestra intitulada “A língua galego-portuguesa no mundo. A matriz galega”.
Na palestra, tratará distintos temas como o surgimento da língua galego-portuguesa no noroeste peninsular, a sua situaçom anterior à entrada do latim, a situaçom lingüística durante a Baixa Idade Media e a dimensom nacional e internacional.
Na sexta-feira 29, Bernardo Penabade e Matias Nicieza falarám do modelo de normalizaçom lingüística de Burela, vila que tem um plano lingüístico pioneiro no país e na que o 80% dos seus habitantes falam, de jeito espontâneo, galego. Incluídos os imigrantes, que procedem de quatro continentes distintos. Assim o quigérom amostrar o professor Bernardo Penabade -membro do equipo redactor do Modelo Aditivo de Política Lingüística Municipal aprovado e aplicado por unanimidade de todas as forças políticas no Concelho de Burela- e o realizador Matías Nicieza, que elaborárom um documentário, de 66 minutos de duraçom. Deste jeito, antes da palestra, projectara-se o documentário “Modelo Burela”.
No sábado 30, o Mádia Leva! acolhe a presentaçom do projecto editorial de Estaleiro. Os objectivos desta editora som a difusom de pensamento crítico, o trabalho sem subsídios, o copyleft e a liberdade normativa. O livro que inaugura a colecçom de ensaio é “A revolução pendente. Democracia e feminismo” de Carlos Diegues, quem estará presente no centro social para falar do livro que, segundo as suas palavras, pretende ser “uma contribuição para a construção de uma alternativa política coerente e global, crítica com um processo globalizador que castiga de maneira especial as mulheres, em forma de violência, de exclusão da cidadania plena e de feminização da pobreza”.
