Valentim R. Fagim – Marta Santos e Marcos Lopes formam parte da equipa promotora da Semente, a primeira escola de ensino em galego. No próximo dia 16 terám umha jornada de portas abertas em que também marcará presença o PGL e que servirá para as pessoas se aproximarem do projeto. Conversámos com eles para sabermos mais acerca da iniciativa.
Quando surgiu a ideia de criar uma escola infantil para 3/6 anos?
A ideia de criar umha Escola Infantil em galego saiu em conversas de sócios e sócias da Gentalha há mais de um ano, se calhar dous. Foi a Assembleia Geral da Gentalha quem, posteriormente, decidiu estudar a possibilidade de abrir umha escola. Com o tempo, esta possibilidade confirmou-se e o projeto abriu-se às pessoas associadas; muitas pessoas, mas sobretodo pais e maes ligadas à associaçom Agarimar, mostrárom interesse e apoio, e algumhas integrárom-se no grupo promotor.
Quantas pessoas estám atrás do projeto e quais som os perfis que se precisam para elaborar e desenvolver um projeto destas caraterísticas?
Para desenvolver o projeto organizámos-nos em três comissons; a de fundos e propaganda; a de infra-estrutura, local e legal; e a pedagógica.
Trabalhando no acondicionamento do local somos unhas 15 pessoas aproximadamente e esperamos que para dar suporte e continuidade à iniciativa se juntem muitas mais.
Por que o nome de Semente?
As pessoas implicadas entom no projeto decidimos elaborar umha listagem com aqueles nomes dos que gostávamos mais. Afinal escolhemos a Semente porque dá ideia de abrolhar, de começar a vida, nom só das crianças, mas também dum projeto que aspira a crescer até se estender a outros níveis educativos. Além disto, decidimos engadir o nome de Escola de Ensino Galego, que era outro dos propostos, em homenagem ao projeto que Leandro Carré e Ángelo Casal levaram a cabo na Corunha a começos do século XX.
Pessoal da equipa promotora acondicionando as instalaçons
Fala-nos um bocado do local? Por que vos conquistou?
Acho que foi a partir de encontrar este local que a ideia da Semente se tornou realidade: um local amplo, luminoso, equipado e com muitos metros quadrados de pátio e horta, um espaço maravilhoso. No caso de destacarmos algumha cousa, falaria da horta, que era chave para nós porque queríamos que grande parte das atividades implicassem umha interaçom direta entre a criança e a natureza. O certo é que ao falarmos da Semente algumhas pessoas tenhem dúvidas, mas todas desaparecem ao mostrar-lhes o local.
Que oferece Semente de distintivo? Por que uma mae, um pai faria uma ótima escolha se escolarizasse o seu filho em Semente?
Som várias as razons polas quais Semente é umha boa opçom:
– Assegura que os nossos pequenos e pequenas sejam educadas na nossa língua, portanto, todas as atividades serám desenvolvidas em galego, favorecendo a aquisiçom, conservaçom, cuidado, e a consolidaçom do nosso idioma, entendendo o idioma galego como parte indissolúvel da nossa cultura, da nossa história e do nosso futuro.
– A nossa escolinha é um espaço de educaçom alternativo que pretende que os educadores e educadoras acompanhem as crianças sem necessidade de as dirigir, respeitando os ritmos e necessidades de cada umha.
– Estamos escolhendo cuidadosamente os materiais, queremos que sejam o mais naturais e singelos possíveis para que os nossos pequenos e pequenas explorem ativamente com todos os sentidos, partindo do concreto, do próximo, do simples e permitindo-lhes manipular, transformar, criar…
– O espaço está estruturado por recantos, (lógica- matemática, leitura, simbólico…) permitindo as nenas e nenos serem autónomos, dando-lhes a opçom de cometer erros e desenvolverem-se sem precisar constantemente da intervençom do adulto, sendo o jogo a ferramenta principal do processo de ensinamento-aprendizagem.
– Outra proposta metodológica que temos é a de trabalhar por projetos. Inspirando-nos em Dewey e Kipatrick este método ativo permite abordar todos os conteúdos de Educaçom Infantil dum jeito significativo e coletivo. Queremos saber mais da nossa cultura e ambiente próximo: “O Entruido”, “O Apalpador”ou “O Nosso Bairro” podem ser exemplos do tipo de projetos que podemos abordar.
– Os valores sociais que queremos transmitir estám presentes em todo o que fazemos; queremos unha escola laica, intercultural, feminista e que mime a nossa cultura.
– A natureza é unha ferramenta imprescindível para nós e por isso contamos com um espaço exterior com árvores de fruto, unha hortinha, zona de relva, um areeiro (em construçom) e outras cousas que queremos fazer (cabanas, rocódromo, labirinto…).
– Outro dos motivos de ser Semente unha boa escolha é a rácio a que se aspira logo que consolidado o projeto, 20 com 2 professores/as. Queremos um ensino personalizado e de qualidade e por isso a rácio será menor que a estipulada por lei.
– Trabalharemos com o curriculum de Infantil oficial, assegurando que a passagem à Educaçom Primária se faga com garantia de êxito.
– A Semente é umha escola que se rege por assembleia e nesta organizaçom horizontal as famílias som fundamentais, necessitamos da sua colaboraçom e participaçom para isto funcionar. É preciso implicarem-se no projeto e nas comissons, decidindo as cousas importantes da nossa escola.
Com umha mesma linha ideológica pola tarde haverá umha ludoteca infantil (3-6) e obradoiros para nenos e nenas de 6 a 12 anos (malabares, papiroflexia, música, dança…) com o objetivo de satisfazer a necessidade de contar com um espaço lúdico como ferramenta integradora sendo de novo o jogo o recurso educativo e criativo.
O contacto com a natureza é importante neste projeto
Dia 16 vai haver uma jornada de Portas Abertas em que estará presente o PGL. Que vamos encontrar nesse dia?
Ademais do marcado na pergunta anterior respeito aos espaços interiores e exteriores, encontraredes um espaço educativo em construçom e muitas pessoas com vontade que queremos mostrar o que estamos a fazer e o que nos resta por fazer para abrir as portas definitivamente em novembro. Veredes umha escola alternativa que acredita e noutro jeito de educar, de viver.
Quais som os alicerces económicos para a Semente se tornar auto-sustentável? Que podemos fazer os leitores e leitoras desta entrevista?
Fruito dumha iniciativa social a Semente sustenta-se economicamente nas rendas obtidas polos alunos e alunas, mas também polos contributos de sócias e sócios que decidem contribuir cada mês, na medida das suas possibilidades, à viabilidade económica da escola. Nom existe lucro: todo o que ganharmos reinveste-se no projeto.
+ Ligaçons relacionadas:
- Andamos novamente a sementar. A colheita desta nova espécie será no outono [PGL, 09/09/2011]
- Abre ‘Semente’, primeira escola de ensino em galego [PGL, 31/08/2011]
- Ficha de inscriçom
- Facebook Semente
- Web [proximamente]
- Contacto Semente: sementecompostela [arroba] gmail [ponto] com
- Número de conta: NGC 2080 0316 29 3000242136
