A quarta ediçom dos Premios Mil Primaveras a projetos de posta em valor e fomento do galego, convocada em 2022 pola CTNL (Coordenadora de Trabalhadoras/es da Normalización Lingüística), reconheceu quatro programas que potencian a oralidade, a reflexom e o uso da língua na formaçom nom regrada. Som ademais projectos que procuram criar comunidade e associar a língua com valores positivos e atraíntes (a inovaçom, a criatividade e a autoestima).
Os Premios Mil Primaveras criaram-se com a finalidade de valorizar, reconhecer e difundir ações, campanhas, programas e projetos que tenhem como objetivo principal o fomento da língua e o incremento do seu uso e/ou prestígio. Desta forma da-se visibilidade a iniciativas de boas prácticas para a saúde do galego.
Concederom-se quatro prémios, sem hierarquias nem clasificaçom por categorias, entre projetos que tiverom vigência em 2019, 2020, 2021 ou 2022. Forom reconhecidos os seguintes: Asociación Faladoiros Vigo (Asociación Faladoiros Vigo), Caranvexo TV (Concelho de Moanha), Laboratorio de Apoderamento Lingüístico (Rexenerando, S. Coop. Galega) e Na Utopía (Na Utopía).
Asociación Faladoiros Vigo
Faladoiros Vigo é umha iniciativa nascida em 2020 com a finalidade de criar espaços amáveis de conversa em galego num contexto urbano como o da cidade olívica. Tanto presenciais como online, buscam formar comunidade onde poder comunicar-se con fluidez e adquirir o costume de falar em galego.
O jurado destacou que a criaçom de ámbitos de uso informais em galego favorecem a confiança das falantes. Ademais, também se valorizou ser umha iniciativa autogerida, que parte da própria sociedade.
Caranvexo TV
O Concello de Moanha lançou a começos do ano 2018 o projecto Caranvexo TV, a televisom escolar de Moanha, com o propósito de desenvolver um recurso de inovaçom educativa pensado como um projeto coletivo, participativo e transversal para dinamizar o uso oral da língua a través do audiovisual.
O jurado destacou que promove o uso oral da língua na infáncia e na mocidade num contexto educativo, criativo e divertido. É ademais um exemplo da colaboraçom entre um Serviço de Normalización Lingüística local e a comunidade educativa numha açom coletiva com obxetivos comúns, que demonstra capacidade de coordinación e cria vínculos a través do idioma.
Laboratorio de Apoderamento Lingüístico
O Laboratorio de Apoderamento Lingüístico (LAB) é um projeto piloto de dinamizaçom do uso da lingua e de gestom do conflito lingüístico, desenhado e desenvolvido pola cooperativa Rexenerando em 2022, com o apoio da Secretaria Xeral de Política Lingüística da Xunta. Integra metodologias de inovaçom social para a sensibilizaçom sobre a diversidade lingüística e a abordagem do conflito lingüístico com a finalidade de ativar umha rede de mocidade comprometida com a língua.
O jurado valorizou que fomenta a participaçom para criar comunidade linguística por meio da reflexom e o debate. Unha das súas potencialidades é que aborda o conflito linguístico dum jeito inovador para ativar falantes entre grupos de iguais. Outro dos seus valores é que nasceu como projeto piloto que se pode espalhar por muitos centros educativos.
Na Utopía
Na Utopía é umha novíssima plataforma de formaçom online integramente em galego sobre distintos ámbitos criativos, técnicos ou divulgativos. Criou-se em 2022 com o fim de proporcionar a oportunidade de aprender conteúdos diversos na nossa língua fora dos circuitos formais ou académicos.
O jurado destacou que é umha ferramenta ao mesmo tempo formativa e normalizadora em mui diferentes ámbitos. Tamén destacou a sua inovaçom e que cobre um nicho de mercado presente com projeçom de futuro. A qualidade dos conteúdos, da imagem e da comunicaçom e o feito de associar a aprendizagem com lazer som outros dos valores apreçados polo jurado.
Jurado, reconhecimento e difusom
O jurado da quarta ediçom dos Premios Mil Primaveras esteve formado por Dores Sánchez Alegre, técnica de normalizaçom linguística da Deputación Provincial da Corunha, Carlos García Vieito, responsável de comunicaçom da Mesa pola Normalización Lingüística, Noemí García Rodríguez, docente da EOI de Lugo, Gabriel Fuentes Míguez, jornalista na CRTVG, e Manuel Reices Vilar, redator-corretor da Deputación Provincial de Ponte Vedra e vogal da CTNL.
Os Premios Mil Primaveras nom tenhem dotaçom económica. Consistem no reconhecimento e na ampla difusom das ações, programas ou projetos escolhidos polo jurado. Para ajudar a dar a conhecer os projetos premiados, já estám disponíveis para a sua consulta detalhada na seçom Projetos premiados e também se difundirám nas redes sociais da CTNL. Além disso, nos próximos meses organizara-se um ato público de entrega de prémios.
