Os e as defensoras da visom galego-portuguesa da língua sofremos umha histórica discriminaçom no ensino, no mundo literário e nas relaçons com a administraçom. Ainda há poucos dias soubemos da proscriçom do galego internacional do prémio Johán Carballeira do concelho de Bueu, e o protesto do ganhador da sua anterior ediçom, Eugénio Outeiro, que por essa razom se retirava do júri.
Há meses, a Deputaçom de Ponte Vedra excluía o centro social A Pedreira das ajudas do programa Culturea, polo nosso uso e defesa sistemática da grafia histórica do galego. Mas temos que dizer com satisfaçom e orgulho que espezinhar os nossos direitos nom é sempre tam doado: Após a vista celebrada hoje 18 de junho no julgado do contencioso administrativo nº 3 de Ponte Vedra, o juiz ditou sentença oral firme, sem possibilidade de recurso nem apelaçom, dando integramente a razom à Pedreira. Durante o procedimento compareceu como testemunha Elias Torres, decano da Faculdade de Filologia da USC, que defendeu a plena legitimidade académica e social da norma reintegracionista. Agradecemos ao professor o seu serviço prestado ao idioma e à liberdade de expressom.
A sentença obriga a Deputaçom a conceder a subvençom que fora indevidamente denegada, e também a assumir as custas do processo. Desde o primeiro momento denunciamos que nom estávamos perante umha decisom técnica ou administrativa, senom perante umha decisom política. Como também foi política a nossa decisom de continuarmos a promover a filosofia reintegracionista em todas as nossas atividades, em recorrer judicialmente, e em procurar o apoio do melhor da nossa inteletualidade galeguista e dos movimentos populares do país.
Os direitos só recuam quando nom se exercem nem se reivindicam. A denúncia pública é ferramenta central para nom nos condenarem a ser estrangeiros na própria Terra, e para abr ir espaços ao galego e à sua visom internacional. Mas hoje nom ganha apenas o reintegracionismo, senom todos e todas os amantes do idioma, da liberdade de expressom, e da cultura pola base construída sem dependências partidárias.
Adiante coa defesa da língua! Adiante com os centros sociais galegos!
Ponte Vedra, em 18 de junho de 2026
