Manuel Maria, sócio da AGAL

Além de defensor da norma histórica do galego, Manuel Maria foi um convicto sócio da AGAL. Manuel Maria Fernández Teixeiro consta inscrito no livro de sócios e sócias da AGAL com o número 469. Tornou-se membro quando a associaçom dava os primeiros passos, em 1986, e nom abandonaria a militáncia nem sequer quando entrou a formar parte da Real Academia Galega. O ex-presidente da AGAL, Alexandre Banhos, resume-o assim: «foi um valioso sócio; comprometido e ao dia no pagamento das quotas até o seu falecimento», em 2004.

Em Manuel Maria, a defesa das teses reintegracionistas nom ficou apenas como declaraçom de intençons, pois, para além de ser sócio da AGAL, também publicou três obras na norma lingüística fomentada pola associaçom: Versos do lume e o vaga-lume (1983), A luz ressuscitada (1984) e Oráculos para cavalinhos-do- demo (1986).

Quando anos mais tarde a editora Espiral Maior publica a Obra Poética Completa de Manuel Maria (2001), inclui os textos de A luz ressuscitada, mas nom na grafia reintegracionista. José-Martinho Montero Santalha, amigo de Manuel Maria e coordenador da publicaçom original, explica que o autor «nom estava nada convencido» do resultado porque, ao seu ver, «esse nom era o caminho». Contudo, também se confessava «canso e com pouca vontade de luitar» nessa altura da sua vida, explica Santalha, pois o autor atravessara diversos problemas de saúde, os quais relata de maneira sucinta numha carta a Maria Virgínia Guerra, filha do poeta português Manuel de Oliveira Guerra.

Declaraçons defendendo o reintegracionismo

Manuel Maria manifestou-se em várias ocasions adepto do reintegracionismo, como regista Camilo Gómez Torres em Manuel María: os traballos e os días (Laiovento, 2001), ao considerar que «é o caminho, pois galego e português som a mesma língua com algumha variante».

No livro de Xosé Manuel del Caño Conversas con Manuel Maria (Xerais, 1990), o escritor de Outeiro de Rei comenta que o feito de nom ter mais obra publicada em ortografia internacional se deve a que «quando começou este movimento [o reintegracionismo] eu já era velho, som algo preguiçoso, e tenho uns hábitos de escritura de trinta anos, mas gostaria de que se utilizasse a grafia do português, conservando o nosso próprio idioma».

Perguntado também por Del Caño, Manuel Maria expom a sua vinculaçom à AGAL e defende os postulados de Ricardo Carvalho Calero:

–Entom, valorizas muito a postura de Carvalho Calero.
–Eu cuido que sim. A de Carvalho Calero e a de toda a AGAL. Eu sou sócio da AGAL e estou com eles.

O próprio Manuel Maria nom via o futuro da língua no isolacionismo pois considerava que «parte do futuro da nossa língua e a sua expansom natural está cara a Portugal. O resto da gente do Estado espanhol é mui diferente a nós, há muitos séculos de mentalidade centralista enriba, e eu cuido que os escritores de línguas periféricas, em Madrid, nom se leem nem traduzidos».

Em direçom similar se exprime numha entrevista ao jornal ourensano La Región: «Neste intre há duas tendências mui claras: a involucionista e a reintegracionista».