A Associaçom José Afonso – Galiza organiza a I Bienal Internacional de Mail Art Zeca Afonso sob a temática das línguas minorizadas para reflectir situaçons de subordinaçom idiomática tanto do galego como das existentes noutras partes do mundo. As pessoas interessadas em participar tenhem de prazo até 1 de Maio para enviar as suas propostas ao endereço Rua do Rego 6C 5D, 15895 Milhadoiro (Ames – Galiza).
A entidade escolheu o suporte do Mail Art para esta actividade criativa com o fim de tornar visível a situaçom das línguas em conflito, das que também se fixo eco José Afonso. A exposiçom inaugural realizará-se este mês de maio, ligada às celebraçons do Dia das Letras Galegas, que comemora a literatura em língua galega. No final do período expositivo, a AJA Galiza editará um catálogo digital de todas as obras, que será remitido às pessoas participantes por correio electrónico junto com um certificado digital que acredite a sua participaçom.
Mail Art é a denominaçom empregada para designar umha actividade artística que utiliza como meio de expressom a distribuiçom postal. Estes envios postais podem ser desde mensagens, collages ou consignas até poemas, relatos curtos ou pinturas. O projeto pretende oferecer umha alternativa à influência das galerias e espaços mercantilizados da arte e fornecer novas vias de distribuiçom para dar a conhecer aquelas artistas que tiverem interesse em dar a conhecer a sua obra através do formato postal.
Poderám participar na bienal todas as pessoas que o desejaren, profissionais ou amadoras, com um máximo de três obras originais e com técnica livre. As obras deverám ser originais ou reproduçom adaptada para o formato postal de obras originais. Todas deverám estar livres de direitos de terceiras pessoas, assumindo esta responsabilidade a pessoa que envia a postal. O único formato admitido para este concurso será o postal, com um tamanho máximo de 15 x 9 cm (6 x 3,5 polgadas) para oferecer um melhor discurso expositivo nos distintos espaços destinados para isso.
Nom serám aceitas obras sexistas, homofóbicas ou contra os valores democráticos, polo que a admissom das postais fica sujeita à valoraçom prévia por parte de membros da AJA Galiza.
As obras recebidas poderám ser expostas em distintos espaços tanto físicos na Galiza e em Portugal, aproveitando a rede de que dispom a AJA Portugal, quanto virtuais através da web www.aja.gal ou nas redes sociais de acordo com a pretensom de difundir a iniciativa. A informaçom referente aos locais e às datas de exposiçons estará disponível no website da AJA Galiza e também nos seus perfis das redes sociais.
