Homenagem a Duarte Abad Lojo este sábado em Compostela

A Sala Malatesta acolherá intervençons políticas, poesia, teatro e música a partir das 21 horas



Homenagem Duarte Abad LojoDoutor em História e especializado nas Irmandades da Fala e Francisco Tettamancy, Duarte Abad Lojo (1967-2017) esteve preso durante 13 anos pela sua açom política, ligada ao Exército Guerrilheiro do Povo Galego Ceive. Natural de Noia e trabalhador do peixe na província da Corunha, o seu passamento foi um grande golpe para o independentismo galego, luta política com a que se comprometera desde moço com a sua militância em ERGA. Esta semana a sua figura será homenageada por amizades e achegadas. Será este sábado às 21 horas na Sala Malatesta.

A actriz Isabel Risco e o músico Xurxo Souto apresentarám o ato, onde haverá espaço para a música com as atuaçons de Pauliña, O Leo Arremecaghoná, García MC, Mini, Manolo Bacalhau, Menina Arroutada e Os Enxebres de San Lázaro. Também falarám as poetas Charo Lopes, Séchu Sende, Ramiro Vidal e Laura Ramos Cuba. Destaca o bocado teatral da velada, quando Xoan Mejuto e Iria Ares interpretarám fragmentos de ‘Rastros‘, obra de Roberto Vidal Bolaño representada uma única vez, na Vilagarcia do ano 1998.

Por último, na homenagem intervirám Joam Lopes –em representaçom das Juntas Galegas pola Amnistia–, Beatriz Doldán –Comités Anti-Represivos–, Suso Seixo –ex secretário geral da CIG–, Elvira Souto –Mesa pola liberdade dos presos independentistas–, Francisco Rodríguez –ex deputado do BNG– e Cristina Rodrigues –por Que Voltem para a Casa–. Esta última entidade será a destinatária da quantidade recada com os 5 euros que custará o bilhete de entrada.


PUBLICIDADE