O instituto corunhês acada a máxima distinçom nos prémios Innovagal
O IES Rafael Dieste vém de ganhar o galardóm con maior prestígio e dotaçom económica destinada à inovaçom educativa e que reconhece os projetos de maior impacto e projeçom no país que incidem de forma positiva na qualidade do ensino.
Com umha dotaçom de 10.000 euros, este reconhecimento soma-se a outros como o Rosalía de Castro de Língua da Deputaçom da Corunha, o do Fórum Europeo do Ensino, o de Innovaçom da SXL da Xunta da Galiza ou o Mil Primaveras da Comissom de Técnicos/as de Normalizaçom da língua.
200 centros de ensino, 20.000 estudantes
A iniciativa cultural, que impulsa a equipa de professorado formada por Alberto Pombo, Mónica Reigía e Arcadio González, e que no curso pasado contou com a colaboraçom de Rubén Melide e Andrea Trasancos, converteu-se na maior campanha de dinamizaçom da língua galega da história, liderada por mais de 20.000 estudantes de 200 centros de ensino de todo o país que exerceram açons porta a porta por mais de 50.000 espaços públicos e privados.
De Viggo Mortensen ao fútbol profesional
Desenhada para conseguir impacto viral nas redes sociais, “Aquí tamén se fala” contou com apoios de referentes culturais nacionais e internacionais como Viggo Mortensen, James Rhodes, Tanxugueiras, Fermín Muguruza, Amaia ou Eduardo Sáez de Cabezón, além de alguns dos principais clubes desportivos galegos, como o Deportivo, Celta, Racing, Lugo, Balonmán Cangas, Obradoiro, Breogán, Voleibol Emevé ou Fútbol Sala Burela, entre outros.
Regitrando a banda sonora do país
“Aquí tamén se fala” é também umha atividade de formaçom para o alunado do IESP Rafael Dieste na que se impartem ateliês de gravaçom, ediçom audiovisual e criaçom musical com especialistas do sector como Tomás Ageitos (Estudios A Ponte), Alberto Castaño (Axencia G) ou Nuno Pico (Grande Amore), e graças aos que o alunado leva adiante produções audiovisuais profissionais nas que registam atuações ao vivo dos principais referentes da música galega atual: Fillas de Cassandra, Xabier Díaz, Antía Muíño, Amancio Prada, Ataque Escampe, Xoan Rubia etc.
Festival de música “Aquí tamén se fala”
Ainda, este grupo de estudantes e profesorado, conseguiram ponher em marcha o que provavelmente seja o único festival de música profissional organizado num instituto público e aberto a toda a cidadania, que conseguiu congregar na sua primeira ediçom perto de 5.000 pessoas na praça da Toleráncia da Corunha com bandas como Grande Amore, Boyanka Kostova, Lontreira ou Leria.
