Partilhar

A nona ediçom dos Prémios Youtubeiras+ já tem vencedoras e vencedores

14 de Fevereiro de 2026
SEM COMENTÁRIOS

Os Prémios Youtubeiras+ já tenhem vencedoras e vencedores. Esta tarde, no Teatro Jofre de Ferrol, foi dado a conhecer o palmarés da nona ediçom deste certame que, organizado polos serviços de normalizaçom linguística dos municípios de Ames, Carvalho, Ferrol, Moanha, Narom, Oleiros, Pontevedra, Róis, Santiago de Compostela e Teio; das universidades de Santiago, Corunha e Vigo; e ainda da Deputaçom da Corunha, tem como objetivo promover o talento em galego nas redes sociais.

*David Ramos, Carlos Vieito, Leila Fernández, Leticia Mayán (A do Chinto) e Xurxo Varela*

À gala, que foi apresentada por Leila Fernández (membro do canal O faiado pódcast) e Carlos Vieito (integrante do projeto Exército Mekemeke), assistírom representantes dos 28 canais finalistas. Ao longo da noite, foi dado a conhecer o veredicto do júri que, nesta ediçom, foi composto por Mónica Valencia, técnica de Normalização Linguística do Município de Ourense; Jon Amil, médico e presidente da Associaçom Galega da Língua (AGAL); Carlos Pereiro, jornalista e comunicador de videojogos; María Rúa, criadora de conteúdos e vencedora do Prémio de Criaçom de Conteúdos de 2024, e Uxío Broullón, ilustrador e designer gráfico.

O Prémio de Criaçom de Conteúdos foi para Konachadas. O júri decidiu galardoar este canal pola “sua qualidade visual, a sua imaginaçom e a sua capacidade” para converter qualquer temática “numa mensagem reflexiva, divertida e reivindicativa, adequada a todos os públicos”.

O Prémio de Melhor Canal distinguiu Rodri Míguez. O júri considerou-no merecedor do galardão “polo seu trabalho jornalístico, o seu percurso e a promoçom da música em galego de forma altruísta”.

O Prémio de Melhor Podcast recaiu em Fóra de mapa pódcast por “usar as suas vozes para criar um conjunto de peças sonoras em forma de janela com a qual nos aproximarmos das culturas, minorias e línguas, com uma ediçom cuidada e profissional”.

O Prémio Qualidade Linguística foi alcançado por Patri Otero por, em palavras do júri, “utilizar e fomentar o bom uso da língua galega, bem como a sua normalizaçom de modo exemplar”.

O Prémio Revelação foi para O búnker debuxos. O júri salientou deste canal a sua capacidade de “surpreender e maravilhar através da animaçom original e artesanal, dando uma nova vida e um novo sentido a memes da nossa terra”.

O Prémio Rede foi conquistado por ChutenMeme por conseguir “através do humor” gerar “novos laços virtuais” e fazer “crescer a comunidade digital galega”.

O Prémio do Público, o único que nom foi decidido pelo júri por se determinar por votaçom popular através da rede, foi para o vídeo Cada historia, unha vida. O 25N no CEIP de Tarrio, de Xurxo Varela.

*Jon Amil, presidente da AGAL e membro do júri; e Nee Barros, sócie da AGAL e membro da organizaçom*

Nesta nona ediçom dos Prémios Youtubeiras+ registrou-se a concorrência de 126 canais diferentes, número que bateu o recorde histórico do concurso e superou a colheita da ediçom anterior, em que participaram um total de 89 canais. Nesta ediçom, que distingue o trabalho realizado pola comunidade criadora de conteúdos em galego na rede ao longo de 2025, permitiu-se a concorrência de perfis em todo o tipo de plataformas. Essa foi a grande mudança nas bases, já que na oitava ediçom só pudo participar quem tivesse perfis no YouTube e TikTok.

À gala de entrega dos Prémios Youtubeiras+ assistírom representantes das diferentes instituições organizadoras como o presidente da câmara de Ferrol, José Manuel Rey Varela; e a presidente da câmara de Narom, Marián Ferreiro; a deputada da Igualdade, Língua e Direitos Civis da Deputaçom da Corunha, Sol Agra; a vereadora da Normalizaçom Linguística de Carvalho, Ángeles Pacoret; a vereadora da Cultura, Normalizaçom Linguística, Ensino e Juventude de Oleiros, María José Santos; a vereadora do Desporto, Relações de Vizinhança, Festas e Rural de Santiago, Pilar Lueiro; a vereadora dos Assuntos Sociais e Emprego de Róis, María Mercedes Basante, ou a vice-reitora da Igualdade e Diversidade da Universidade da Corunha, Cristina López.

RELAÇOM DE VENCEDORAS POR CATEGORIAS
(Entre parênteses especifica-se o município de residência das pessoas criadoras)