Livro publicado originalmente em 1984 e já descatalogado

Reediçom em formato eletrónico de ‘A luz ressuscitada’, de Manuel Maria

Umha iniciativa da Associaçom Galega da Língua com autorizaçom da Fundación Manuel Maria



Capa original de 'A luz ressuscitada'

Capa original de ‘A luz ressuscitada’

A Associaçom Galega da Língua (AGAL) continua com iniciativas para homenagear Manuel Maria, autor ao qual é dedicado o Dia das Letras Galegas deste ano. Após a ediçom de cartazes em que se salienta a defesa que o autor chairego fijo do reintegracionismo, a AGAL apresenta agora a reediçom, em formato eletrónico do livro de poemas A luz ressuscitada, que se pode conseguir gratuitamente desde já.

Com esta obra, o selo editorial da AGAL inaugurava em 1984 coleçom Criaçom e fazia-o, ainda, com um autor reconhecido da nossa literatura. Agora, trinta e dous anos depois, A luz ressuscitada inaugurará a secçom de livros eletrónicos da loja on-line da Através Editora, o atual carimbo editorial da associaçom.

Naquele já longínquo 1984, a coordenaçom editorial de A luz ressuscitada correspondera ao professor José-Martinho Montero Santalha, amigo pessoal de Manuel Maria, responsável também pola adaptaçom deste livro de poemas à norma histórica do galego. O prefácio, concibido como umha espécie de carta ao autor, foi obra do também professor e amigo António Gil Hernández, quem aproveitou para traçar umhas notas sobre a codificaçom da língua galega e analisar de maneira crítica o livro.

A versom eletrónica é fruto do interesse da AGAL em disponibilizar de maneira acessível este livro de poemas, projeto que em todo momento contou com a autorizaçom da Fundación Manuel Maria.

Como conseguir a versom eletrónica?

Esta ediçom é fruto de um labor de scaneado do livro original, reconhecimento automático do texto e correçom manual dos eventuais erros do processo. A diagramaçom foi realizada ex novo, intentando ser o mais fiel possível da original.

A versom eletrónica de A luz ressuscitada está disponível na loja on-line da Através em dous formatos diferentes, PDF e ePub, de maneira a oferecer polo menos duas alternativas de consulta e tornar mais agradável a leitura em diferentes dispositivos. Para descarregar o livro basta com criar umha conta de utilizador/a na loja on-line e descarregar o livro a partir da ficha do mesmo. Será descarregado um ficheiro comprimido em formato ZIP, no interior do qual estám as versons em PDF e ePub.

+ Ligaçons relacionadas:


PUBLICIDADE

  • potanonimomain

    escaneado, nom scaneado