PGL – Hoje, quarta-feira dia 18, a Biblioteca Pública Miguel González Garcés da Corunha acolhe um espectáculo de Regueifas no que participarám Josiño da Teixeira e Luís “O Caruncho”.
A regueifa é um dos elementos mais característicos da nossa cultura popular. Um desafio oral improvisado em verso onde duas ou mais pessoas disputam, utilizando a retranca, o humor e muito engenho e criatividade, procurando manter sempre unha cadencia rítmica nas frases e rimas. Habitualmente este duelo dialéctico costumava ter lugar nos mais diversos actos sociais.
Ainda que a regueifa, que também recebe o nome de desafio, trovo, poesia improvisada ou repentismo, segundo os lugares, está estendida por numerosos pontos do país. Na Galiza apenas ficam praticantes em Bergantinhos (regueifeiros) e na montanha de Lugo (brindeiros). Por esta razom, a associaçom oral tem agora como objectivo resgatar a regueifa do esquecimento mediante um plano integral de recuperaçom, organizando um circuito estável de actuaçons, fomentando o intercambio com praticantes doutras variantes afins no país e potenciando a formaçom introduzindo-as nos âmbitos educativos e intelectuais.
Desde 1995 organiza o “Certame Internacional de Improvisaçom Oral e Regueifas” dirigido a todos os públicos, e desde 2007 o “Certame escolar de Regueifas”, no que se realizam obradoiros com as novas tecnologias ou no que os alunos participam regueifando com novas formas musicais como o hip hop ou o rap.